Aktiviteiten

Disse weke kwammen de vri’jwilligers van de grote winterveurleesaktie in alle Stellingwarver zorginstellings bi’j mekeer. Niet alliend de aktie zels is ondertussen een jaorlikse tredisie wodden, etzelde gelt veur de evaluaosie naoderhaand. Deur verschillende omstanigheden zoas o.e. ziekte kon niet iederiene dit jaor kommen, mar et grootste pat vertelde mekeer weer over zien erverings van dit keer. Overdudelik was dat de aktie weer arg positief erveren is, deur de meensken die naor de verhaelen luusteren, de zorginstellings én deur de veurlezers zels. Et naor mekeers erverings van et veurlezen luusteren en d’r mit mekeer over te praoten wodt ok as arg nuttig beschouwd. Schrieversronte-mitwarkster Immy Sloot die de aktie altied tiptop veurbereidt hadde ok disse middag weer goed veur mekeer. An et aende van de bi’jienkomst las schriefster Sjoukje Oosterloo heur verhael ‘Duvelskeunsten’ veur (zie foto’s), mit dat verhael wun ze een peer jaor leden de Stellingwarver Schrieversri’jepries. Alle veurlezers kregen van de Schrieversronte as daank et boek ‘Malle meraokels’ van Sjoukje Oosteloo mit. In jannewaori 2016 wodt de veurleesaktie opni’j holen. (Foto’s: Sietske Bloemhoff)

Vanof maendag 13 april is d’r bi’j de Stellingwarver Schrieversronte in Berkoop twie weken lange een tentoonstelling rond de Twiede Wereldoorlog. De tentoonstelling, die holen wodt omreden et van ’t jaor 70 jaor leden is dat oons laand bevri’jd wodde, is mit naeme richt op wat d’r in die periode gebeurde in de Stellingwarver regio. De tentoonstelling wodt inricht deur Hendrik Betten van Else, Jan Menger uut De Blesse en Jan de Vries van Wolvege.

Veul materiaol dat te zien wezen zal komt van Jan Menger uut De Blesse. Tegere mit Jan de Vries richtte Menger jaoren leden al es een vergeliekbere tentoonstelling in, die was in et gemientehuus in Wolvege. Dat gebeurde doe mit naeme in et kader van et vak Hiemkunde in et basisonderwies. Ok dit keer zullen schoelen nuugd wodden om naor de tentoonstelling te kommen; d’r wodt daorveur speciaol een begeleidende lesbrief ontwikkeld deur mitwarkers van de Schrieversronte.

Hiel biezunder wodt de speciaole beeld- en geluudshoeke. Daor zullen deurlopend filmbeelden te zien wezen, mar d’r bin ok biezundere gesprekken te heuren van ooldere inwoners die nog over de zwaore oorlogstied vertellen. Veur dat laeste onderdiel zorgen Hendrik Betten en Jan de Vries.

De tentoonstelling is op maendag tot en mit donderdag te bezuken tussen negen en vier ure. Op vri’jdag en zaoterdag kuj’ terechte van 10.00 tot 17.00 ure. Op zundag is et gebouw sleuten. Veur meer info kuj’ mailen naor info@stellingwarfs.nl of bellen mit et Schrieversrontekantoor: 0516-451108.

Van links naor rechts: Ella Dekker, Mariska Schouten en Allesse Eizinga (Buttinge), Annemieke Jager en Christine Mulder. Aachter Roelov Kuipers, Gerard van Klaveren en Doeke Duursma.  (Foto: Lenus van der Broek).

De eerste ‘Stellingwarver Veurleuspries’ is een sukses wodden. Zeuventien kiender en volwassenen deden 29 jannewaori an de veurleeswedstried mit. Ze bruukten daorveur eigen gedichten en verhaelen in et Stellingwarfs.

De pries is een gemientelike Stellingwarver pries van West- en Oost-Stellingwerf. De gemienten willen d’r op disse wieze graeg an mitwarken dat et Stellingwarfs in ere holen wodt. De orgenisaosie was in hanen van de biebeltheek Zuudoost Frieslaand. Ok de perveensie verstrekte een financiële bi’jdrege. De jury beston uut burgemeester Gerard van Klaveren (veurzitter), Doeke Duursma en Roelov  Kuipers. De aovend wodde prissenteerd deur jeugdbibliothekeresse Klaasje Herder van Oosterwoolde.

In de kattegerie individuele jeugd tot en mit 12 jaor wodde Annemieke Jager uut Berkoop eerste en in de kattegerie volwassenen Christine Mulder van Wolvege. In disse katttegerie kreeg Attie Nijboer (Oosterwoolde) de anmoedigingspries. In de kattegerie schoelen wodde OBS Buttinge van Oosterwoolde eerste. De gedichten wodden veurdreugen deur Mariska Schouten, Ella Dekker en Allesse Eizinga en schreven deur meester Wim Hunneman.

Volgend jaor wodt de Stellingwarver Veurleespries in de bieb van Oosterwoolde holen.