De Stellingwarver Veurleespries veur jong en oold

De Stellingwarver Veurleespries is een ni’je veurleeswedstried van Stellingwarver gedichten, liedteksten, vassies of kotte poëtische teksten veur jeugd en volwassenen. Disse pries is een gemientelike Stellingwarver pries van Oost- en West-Stellingwarf tegere. De gemienten willen d’r op disse wieze graeg an mitwarken dat et Stellingwarfs in ere holen wodt; de orgenisaosie is in hanen van de Stellingwarver biebeltheken.

Wie an disse biezundere veurleeswedstried mitdoen wil kan veur de veurweerden daorveur kieken op de webstee www.bzof.nl. Op de nationaole gedichtedag op 29 jannewaori 2015 lezen alle nommeneerden in de biebeltheek van Wolvege veur, aovens van half achte tot negen ure. Et wodt vanzels een groot feest, waorbi’j een deskundige jury de winners anwiezen zal!

DSC_3194, Sjoukje, Sierd en oorkonde

In 2013 wun Sjoukje Oosterloo uut Drachten, mar ofkomstig van Oosterwoolde, de Stellingwarver Schrieveri’jepries. De orgenisaosie van die gemientelike pries gebeurde tot en mit die keer deur een speciaol daorveur instelde warkgroep, en is daornao uutbesteded an de Stellingwarver biebeltheken. (Foto: Lenus van der Broek)

Twitteren op 29 jannewaori

Woensdag 29 jannewaori is de nationaole gedichtedag. Die dag is mitien et begin van de ‘Poëzieweek’ die ieder jaor holen wodt en dit jaor tot en mit 4 feberwaori duurt.

Krek as twie jaor leden gaot de Stellingwarver Schrieversronte op 29 jannewaori elk ure een Stellingwarfs gedicht twitteren. Iederiene die d’r nocht an het kan veur die dag een eigen twittergedicht insturen. Daor bin vanzels wel een peer veurweerden an verbunnen… Et moet om een Stellingwarfstaelig gedicht gaon; mar in et Nederlaans mag ok, dan moet et onderwarp liekewel mit Stellingwarf te maeken hebben.

Een twitterbericht, dus ok een twittergedicht, mag bestaon uut hooguut 140 leestekens, inkl. spaties. Et is een butengewoon aorige uutdaeging om je ‘bosschop in dichtvorm’ in die beparkte ruumte kwiet te kunnen. Wie lokt dat en dot mit??

Ie kun je twittergedicht t/m 28 jannewaori mailen naor de Stellingwarver Schrieversronte: info@stellingwarfs.nl.

Megin’s Move wint Stellingwarfpop 2014

minke en lucia

Megin’s Move wun Stellingwarfpop overtugend. Rechts Minke Soolsma, links Lucia Hebers. (Foto: Janko Blaauw)

Veul kwaliteit was d’r zaoterdagaovend te heuren tiedens de zeuvende edisie van Stellingwarfpop. Et was daoromme veur de jury nog niet zo ienvooldig om de in heur ogen drie beste Stellingwarver lieties an te wiezen. Toch bleken Klaas Ozinga, Peter Riksma en Frank Spijkers et hielemaole iens te wezen angaonde de winner van de eerste pries. Die was veur et folkduo Megin’s Move, en as d’r een pebliekspries west wezen zol, hadden Minke Soolsma (zang, gitaar) en Lucia Hebers (trommen, basgitaar, zang) daorveur zeker ok hoge ogen scoord.

De twiede pries was krek as veurig jaor veur Shady Lane uut Makkinge. Die band zorgde opni’j veur een ommeraek goed optreden en een arg goed Stellingwarfs nommer. De dadde pries was veur The After Midlife Group uut Wolvege, die daormit die pries veur de dadde keer wunnen. Veul wardering was d’r veur heur hiele optreden, ok al omreden alle lieties en de prissentaosie hielemaole in et Stellingwarfs was.. Mar ok ‘Spirit of the dark’ van Else zorgde veur veul eigen Stellingwarfs wark en eupende et festival niet alliend daoromme al hiel goed. Carmentheband, de band van gitarist Rob Zandgrond, die in et daegeliks leven o.e. meziekles geft an et Lendekollege in Wolvege, zorgde veur een stevig en goed verzorgd optreden, mit veurtreffelike zang van de in Haulerwiek woonachtige Sietske Sietsma.

Hiel arg jammer was dat et optreden van Serge Epskamp van Zaandhuzen niet deurgaon kon. Middags kwam hi’j slim ongelokkig te valen wat him een kneusde aarm en schoolder opleverde. Et festival wodde op een vlotte en eigen wieze prissenteerd deur Jelke Nijboer van Berkoop. In 2015 wodt Stellingwarfpop opni’j orgeniseerd, mar de orgeniserende warkgroep van de Stellingwarver Schrieversronte wil weer es kieken naor een aandere opzet.

 

Harlingen in ’e mist

 

Et zoolt van de zee bit mien droom kepot

De kracht van de wiend blaost mien toekomst vot

De stienen van de diek liggen zwaor in mien lief

Et waeter van de zee kropt ok nog omhogens.

 

Harlingen in ‘e mist, ziej’ wel wat d’r mist?

Verdwaeld in de stad, et pad is nat en gries

Ik bin mien hatte verleuren, en kan niet veerder zien

Want Harlingen in ‘e mist, ik weet wel wat d’r mist.

 

Ik dwael deur de stad, ie bin hier ok al west

Et geluud van de misthoorn jankt de hiele dag

De zunne het zien nocht en zakt vot in de zee

Ik dwael deur de stad, de straoten bin leeg.

 

Harlingen in ‘e mist, ziej’ wel wat d’r mist?

Verdwaeld in ‘e stad, et pad is nat en gries

Ik bin mien hatte verleuren, en kan niet veerder zien

Want Harlingen in ‘e mist, ik weet wel wat d’r mist.

 

De zee, de zee, hi’j nemt en hi’j brengt

In de haven drift een schip en ik daenk dat et zinkt

De wiend trekt weer an, de mist trekt naor et laand

De maone, de maone, verlocht, verlocht mien pad.

 

Harlingen in ‘e mist, ik weet wel wat d’r mist.

Ik bin mien hatte verleuren, mar kan weer veerder zien.

 

Harlingen in ‘e mist, ik weet wel wat d’r mist.

Ik bin mien hatte verleuren, mar kan weer veerder zien.

 

 

 

STELLINGIA de locht in!

22-11-14

Tiedens Eupen Dag ‘Stellingia.nl’ de locht in

Zaoterdag gong tiedens de Eupen Dag van et Kenniscentrum van de Stellingwarver Schrieversronte de ni’je webstee www.stellingia.nl officieel in gebruuk. Sund zoe’n aanderhalf jaor is een groep van omdebi’j zes aktieve vri’jwilligers van de Stellingwarver Schrieversronte drok in de weer om alle dokementen, foto’s, kollekties en zo wat henne uut dat centrum te digitaliseren om ok op die wieze al dat belangrieke materiaol veur de toekomst goed te beweren. Krek lieke belangriek vint de SSR et liekewel om alle inscande wark mitien ok op de ni’je webstee van et Kenniscentrum te plaetsen. Iederiene kan zo op een makkelike wieze op Stellingia kieken wat d’r in et centrum in Berkoop an gegevens over de streekgeschiedenis en streektael te vienen is. De Schrieversronte vint de ni’je webstee mit naeme ok van belang veur leerlingen van et vervolgonderwies en HBO- en universitaire studenten. De kommende tied zal mit riegelmaot et anbod op Stellingia anvuld wodden. Stellingia.nl is ontwikkeld deur Ninke van der Veen, iene van de jonge mitwarkers van de SSR. Meensken, die naor et Kenniscentrum zels kommen, kun bi’j heur zuukwark gebruuk maeken van de ni’je studiekaemer. In die kaemer is ok een uutgebreide haandbiebeltheek opneumen, d’r staot een komputer veur gebruuk en de ruumte is veurzien van WIFI. Een bezuuk kan alliend op ofspraoke; boeken en eer materiaol uut et Kenniscentrum wo’n niet uutliend. Veur de verni’jingsslag van et Kenniscentrum was d’r bi’j de bezukers an de Eupen Dag ommeraek veul wardering. (Foto: Lenus van der Broek)

 

Veul interesse en wardering veur Lendesymposium

De Lende is veur veul Stellingwarvers een begrip. Dat gelt netuurlik in et eerste plak veur meensken die al langer in oonze regio wonen, mar ok ni’je inwoners maeken al rap op de ien of aandere meniere kennis mit disse revier. Op 14 november was d’r in Noordwoolde de hiele dag ommedaenken veur De Lende tiedens een symposium dat deur de Stellingwarver Schrieversronte organiseerd wodde. In zes inleidings wodde de revier vanuut verschillende invaalshoeken belocht. Daarveur zorgden dr. ing. Dennis Worst (ontstaonsgeschiedenis), Geert Lantinga (kannelisaosie), dr. Henk Bloemhoff (naemgeving), dr. Meindert Schroor (verdedigingslinies), Jan Slofstra (verbanen mit ere revieren in de omgeving) en Peter Riksma (literetuur). Daornaost weren d’r tiedens et symposium schilderi’jen te zien van ‘Lende-schilderes’ Annie Ligthart van Oosterwoolde. Et as slim suksesvol erveren symposium wodde bezocht door roem vuuftig personen. Op termien zal de Stellingwarver Schrieversronte een omvangriek boek uutgeven over disse Stellingwerver revier bi’j uutstek. Jim zien hieronder een foto-impressie van Lenus v.d. Broek:

Gert en Ype, symp.

Dagveurzitter Ype Dijkstra en inleider Geert Lantinga

Henk, symp.

Henk Bloemhoff over de naemgeving: de revier hiette hiel vroeger ‘Lenna’, doe ‘Lenne’ en laeter ‘Lende’

Meindert

Meindert Schroor vertelde over belangrieke en de wat minder belangrieke verdedigingslinies in et noorden van et laand

Sch. Annie

Veul belangstelling was d’r ok veur de schilderi’jen van Annie Ligthart