Aktiviteiten

Tiedens de evaluaosie van de oflopen veurleesaktie in de Stellingwarver zorgtehuzen, die kotleden holen is, is besleuten om de volgende keer de aktie opni’j in jannewaori te orgeniseren. Dat zal dan wezen in jannewaori 2015. Et doel is ok om in plak van twie daegen een hiele weke veur de aktie uut te trekken, zodat de veurlezers wat makkeliker uut de beschikbere tied kiezen kunnen. Ok dit keer dee weer blieken dat alle vri’jwilligers die mit mekeer veur de veurleesaktie zorgen de evaluaosie biezunder op pries stellen. Ieder kan zien erverings en verhael kwiet en vaeke is d’r dan bi’j de eren veul herkenning. D’r wo’n tips uutwisseld mar ok et stokkien verbunnenhied bi’j disse prachtige akties is van veul belang. Et dee blieken dat de aktie bi’j de bewoners van alle zorginstellings ommeraek goed voldaon het, en datzelde gul ok veur de veurlezers. Mar op ien plak gong et wat mis, omreden d’r in et tehuus zels de orgenisaosie niet goed veur mekeer was. Ok de beschikbere verhaelen voldoen goed; alle jaoren wo’n die mit ni’je verhaelen anvuld, zodat de keuze veur de veurlezers de hieltied groter wodt. An de veurleesaktie doen jaorliks rond de twintig vri’jwilligers mit, de orgenisaosie van de aktie wodt daon deur Schrieversronte-mitwarkster Immy Sloot.

Alle jaoren is d’r nao ofloop van de evaluaosie een aorig (veurlees)optreden; dit keer zorgde veurlezer Jacob ten Have van Appelsche veur een fleurig stokkien meziek. Ten Have nemt tiedens de veurleesaktie ok altied zien akkordeon mit en speult en zingt dan tussen de verhaelen deur. Hi’j krigt aenlik altied iederiene wel an et mitzingen en dat lokte him ok in Berkoop zonder muuite! (Foto: Joke Stellingwerf)

Stellingwarver Dag in Buil!

Op zaoterdag 17 meie zal Buil de hiele dag in et teken van et Stellingwarfs staon. Die dag orgeniseert de warkgroep Publiciteit van de Stichting Stellingwarver Schrieversronte veur et eerst een Stellingwarver Dag in een Stellingwarfs dörp. Et doel is om de Stellingwarver Dag ieder jaor in een aander plak te holen, én om op die dag mitien ni’je leden te winnen veur de Schrieversronte.

De dag begint morgen al mit gezellige aktiviteiten, d’r kan keuzen wodden uut verschillende meugelikheden. Middags zal d’r buten o.e. ommedaenken wezen veur de jeugd. Veur de ooldere meensken zullen, zo is et plan, iene of meer ooldere filmbeelden uut et dörp vertoond wodden. Mitwarking daorveur is d’r in elk geval van Jan de Vries van Wolvege. Aovens zullen verschillende Builiger verienings veur een spetterend, ofwisselend en Stellingwarfs pergramme zorgen, mit o.e. een Stellingwarver ienakter en een prachtige ofsluting deur een jonge band uut Buil.

Mit een posien maeken we et pergramme van die biezundere zaoterdag in de bluuimaond bekend!

Boekbiendersmanifestaosie bi’j de Stellingwarver Schrieversronte

Bi’j de Stichting Stellingwarver Schrieversronte (SSR) in Berkoop verschient in de eerste helte van 2014 een boek mit wark van bekende Stellingwarver dichters en keunsteners. Veur et wark dat in Van schossel tot slingerpad opneumen is, hebben Roely Bakker (gedichten), Peter Hiemstra (beelden), Christiaan Kuitwaard (schilderi’jen), Christine Mulder (gedichten), Marjolein Spitteler (mingde techniek) en Willem Jan Teijema (gedichten) heur inspireren laoten deur et thema ‘Ruumte’. Et boek is an et aende van jannewaori klaor, mar wodt pas prissenteerd tiedens de eupening van ‘Eupen Stal’ 2014. Dat komt omreden an et verschienen van Van schossel tot slingerpad een boekbiendersmanifestaosie koppeld is. Iene van de belangriekste onderdielen van die manifestaosie is een wedstried haandboekbienen.

Vervolgens ligt et in de bedoeling om tiedens de tentoonstelling Eupen Stal in 2014 et boek, de kunstwarken én de rissultaoten van de haandboekbiendmanifestaosie (mit katalogus) te prissenteren. Eupen Stal is dit jaor van 12 juli t/m 10 augustus.

Biezundere pebliekspries

An de manifestaosie is een pebliekspries verbunnen. Veur de deur et pebliek van Eupen Stal uutkeuzen inzendings wo’n deur de drie keunsteners en dichters speciaol drie kombinaosies van gedichten en keunstwarken maekt.

Et mitdoen an de wedstried

Iederiene kan an de wedstried haandboekbienen mitdoen, ammeteurs liekegoed as professionals. Veur wie graeg mitdoen wil volgen hier de technische gegevens:

– et boek telt 56 bladzieden, die drokt binnen op 150 grams hooltvri’j MC mat.

– et fermaot is 24 x 24 cm.

– de katernen bin volen en niet perforeerd.

– veur de schutblaeden bin twie blanko dubbelvellen beschikber

De kosten om mit te doen bin € 20,00. Die bin bedoeld veur et toesturen van de katerns, et weerommesturen van et boek, mar ok veur de katalogus die vlak veur Eupen Stal begint verschienen zal en de dielnemersformelieren. Et bedrag kan overmaekt wodden op NL26FRBK0299807711 t.n.v. Stichting Stellingwarver Schrieversronte.

Anmellen kan bi’j de Stellingwarver Schrieversronte, o.v.v. Boekbiendersmanifestaosie. Et adres is: Willinge Prinsstraote 10, 8421 PE Berkoop / Oldeberkoop

Je opgeven kan ok via de mail: info@stellingwarfs.nl

Veur meer info kuj’ bellen: 0516-451108, even vraogen naor Sietske Bloemhoff

Naodat de € 20,00 overmaekt binnen wo’n de katerns rond 1 feberwaori toestuurd. Veur 15 meie 2014 moet jow inzending bi’j de Schrieversronte binnen wezen.

De warkgroep ‘Alles rondom taal’ van Stichting Kunstwerf orgeniseert now vri’jdagaovend 20 december een prachtige aovend mit winterse verhaelen. Professioneel verhaelevertelster Baukje Koolhaas van Wienjewoolde vertelt die aovend sfeervolle verhaelen rond et thema ‘Een lamp voor licht en warmte’.