Aktiviteiten

aktiviteiten

Kursus ‘Stellingwarfs veur beginners’ gaot op 12 november uut aende

door

Kursus ‘Stellingwarfs veur beginners’

 ‘Waoromme schrieven we ‘schrieven’ en niet ‘schriev’n’ of ‘schrievm’?

‘Is et now volle maene of volle maone?

 Aj’ graeg mit et schrieven van et Stellingwarfs an de slag gaon willen, kuj’ vanzels flink wat infermaosie in verschillende boeken en op de Stellingwarver webstee StellingPlus vienen. Mar et schrieven van et Stellingwarfs leer ie veural deur et vule te doen. Ie kommen dan liekewel ok talloze zaeken tegen waor aj’ wel graeg wat meer van weten willen zollen. Waoromme schrieven we ‘schrieven’ en niet ‘schriev’n’ of ‘schrievm’? Wanneer schrieven we ‘ao’ en wanneer ‘ae’? En waor komt dat Stellingwarfs now aenlik weg, we wonen toch in Frieslaand? Veur et antwoord op zokke en veul meer aandere vraogen orgeniseert de Stellingwarver Schrieversronte de kursus ‘Stellingwarfs veur beginners’. De kursus geft butendat een boel meensken die al wat mit et Stellingwarfs in de weer binnen een mooi steuntien in de rogge.

Behalven daj’ bi’j disse kursus dus aorig mit de schrieveri’je an de slag binnen, is d’r ok ommedaenken veur et praoten in et Stellingwarfs. Butendat koj’ in de kunde mit de geschiedenis en volkskunde van Stellingwarf en is d’r andacht veur de biezundere ligging van de streek.

De kursus ‘Stellingwarfs veur beginners’ bestaot uut tien lesaovens en begint op deensdagaovend 12 november. De kursus is van half achte tot half tiene en wodt geven in et gebouw van de Schrieversronte in Berkoop. De kosten bin € 75,00, dat is inklusief koffie of thee mit wat d’r bi’j.

Meensken die interesse hebben kun et beste even bellen mit et kantoor van de Schrieversronte: 0516-451108, of mailen naor: info@stellingwarfs.nl.

Sutelaktie gaot 26 augustus uut aende

door

Sutelaktie Schrieversronte gaot op 26 augustus uut aende

Op maendag 26 augustus gaot in de gemiente West-Stellingwarf weer de jaorlikse sutelaktie van de Stellingwarver Schrieversronte uut aende. Tiedens die aktie wo’n mit naeme de ni’jste boekuutgiften van de stichting huus an huus te koop anbeuden. Zoe’n 75 vri’jwilligers zorgen d’r alle jaoren weer opni’j veur dat veul meensken ok op disse wieze in de kunde kommen mit de Stellingwarver streektael en streekkultuur. Behalven boeken liggen d’r in de sutelkrojen ok cd’s, de ni’je Stellingwarver spreukekelender en et Stellingwarver tiedschrift De Ovend te koop. Veurdat ze op pad gaon kommen de sutelders eerst bi’j mekeer in et gebouw van de Schrieversronte in Berkoop. Mit een geweldige galp op de speciaole suteltoeter wo’n de sutelaktieweken elk jaor eupend.

De sutelaktie komt op 26 en 28 augustus en 2 september in: De Hoeve, De Langelille, De Oosterstreek, Munnikeburen, Noordwoolde, Scharpenzeel, Sliekenborg, Spange en een pat van Wolvege.

Op 4, 9 en 11 september wodt d’r suteld in: Appelsche-Zuud, Berkoop, Makkinge, Ni’jberkoop, Oosterwoolde-Zuud en Haulerwiek.

DSC_9554

Onder anvoering van Schrieversronteveurzitter Ype Dijkstra blaost sutelvri’jwilligster Titia op de speciaole suteltoeter en kon de sutelaktie van 2012 beginnen! (Foto: Lenus v.d. Broek)

 

Line-up Stellingwarfpop 2013 bekend

door

Ok al is de zesde edisie van Stellingwarfpop 2013 pas op 9 november, et pergramme veur et popfestival zit now al vol. Kotleden gaf de zesde band him op veur de wedstried. Behalven de optredens van de dielnemers an die wedstried is d’r ok een optreden van Serge Epskamp, hi’j wun Stellingwarfpop in 2012. Wie an Stellingwarfpop mitdoen wil, moet op zien minst ien origineel lietien in et Stellingwarfs naor veuren brengen. Dat hoolt niet alliend in dat de tekst ni’j wezen moet, mar etzelde gelt ok veur de meziek. De laeste jaoren vaalt op dat de hieltied meer dielnemers meerdere lieties in de streektael bruken gaon, en daor is de orgenisaosie ommeraek wies mit.

De dielnemers van Stellingwarfpop 2013 bin:

The After Midlife Group

Shady Lane

Spirit of the dark

Rock-Revelation

Rosey Kills

‘k Wait nait

De deskundige jury, die uutmaeken zal welke Stellingwarver lieties et beste binnen, bestaot uut Robert van Dam, Klaas Ozinga en Peter Riksma. Veur de drie beste lieties bin geldpriezen beschikber steld. Stellingwarfpop wodt prissenteerd deur Fons Herder, hi’j is o.m. bekend as zanger van A Liquid Landscape.

Stellingwarfpop 2013 is op 9 november in et dörpshuus van Makkinge, et festival begint aovens om half achte. De toegang is ommenocht.

Meziek in de Stellingwarver netuur

door

Meziek in de Stellingwarver netuur:

DSC_7259

 

DSC_7270

 

DSC_7276

 

DSC_7286

 

Veurofgaonde an et popfestival Farmfest in Ooldetriene wodde op zaoterdag 13 juli ‘Farmfest verdwaelt’ orgeniseerd. Op verschillende plakken in een speciaol uutzette kuiertocht deur de Rottige Miente weren akoestische optredens van zes bands en singer-songwriters. Een prachtig intitiatief, waor roem honderd belangstellenden ommeraek van geneuten hebben. (Foto’s Lenus van der Broek)

OPROEP: Schrief een spannend verhael!

door

Meensken die d’r aorighied an hebben om in et Stellingwarfs te schrieven, kun dit jaor weer een gooi doen naor de Stellingwarver Schrieveri’jepries. Die pries wodt om de twie jaor uutrikt en is bedoeld om et schrieven in et Stellingwarfs bi’j jong en oold an te vieteren.

Bi’j et uutschrieven van die anvieteringspries wodt deur de orgeniserende warkgroep elke keer een aander thema bedocht. Dit keer is de keuze valen op et schrieven van een spannend verhael in et Stellingwarfs. Veerder is keuzen veur twie leeftiedsgroepen. Zo kun jongeren tot en mit zestien jaor een verhael insturen en schrievers die oolder binnen as 16 jaor.

De dielnemers an die schriefwedstried kun heur eigen fantesie gaon laoten bi’j et schrieven van een ’thriller’. D’r wo’n gien beparkings oplegd, ok niet wat de lengte van et verhael anbelangt. Et verhael dat deur de dielnemers schreven wodt, moet veur 15 oktober inzunnen wodden. Een driekoppige deskundige jury gaot him dan bugen over de inzendings en beoordielt welk verhael as et beste uut de busse komt.

De pries veur et mooiste spannende verhael bestaot uut een geldbedrag van 500 euro en een oorkonde. De uutrikkinge van de Stellingwarver Schrieveri’jepries 2013 is op 22 november in de biebeltheek in Wolvege. De laeste prieswinner was Roely Bakker uut Makkinge. Tegere mit heur kleindochter schreef ze doe ‘Et verhael van Beppe en Renée’. Uut zeuven inzendings wodde dat keuzen as beste verhael.

Dielnemers an de Stellingwarver Schrieveri’jepries moe’n heur verhael veur 15 oktober opsturen naor de siktaoris van de orgeniserende warkgroep: Anne de Vries, Assepot 29, 8431 SB Oosterwoolde. Veerdere infermaosie over de pries en et riegelment is te kriegen bi’j veurzitter Jelke Nijboer, tillefoon 0516-451789.