Aktiviteiten

aktiviteiten

‘Wat een keunst!’: veurlezen uut et ni’jste Tomke-boekien

door

 DSC_5285

Alle andacht is veur Tomke en die zien aeventuren! (foto: Lenus van der Broek)

DSC_5301

Tomke in ukkespeulplak ’t Anlopien in Hooltpae (foto: Lenus van der Broek)

In de eerste volle weke van juni is et op ukkegebied in de hiel Frieslaand een drokte van belang! Die weke wodt d’r sund jaor en dag de grote veurleesaktie holen in veerweg de meerste ukkespeulplakken en plakken veur kienderopvang. Ok in zowat alle Stellingwarver dörpen bin die weke veurleesvri’jwilligers in de weer om de kiender in de kunde te brengen mit de prachtige verhaelties over et joongien Tomke en zien kammeraoties Romke et hontien en de kangeroe Kornelia.

DSC_5308

Neeltje Lenting lest veur in ukkespeulplak Nijntje in Oosterwoolde (foto: Lenus van der Broek)

In hiel Frieslaand wodt d’r in meerdere taelen veurlezen, mit naeme in et Bildts, et Fries en et Stellingwarfs. De veurleesaktie wodt orgeniseerd deur et ‘Selskip foar Fryske tael en schriftekennisse’. In de Stellingwarven verzorgen zoe’n twintig vri’jwilligers van de Stellingwarver Schrieversronte de aktie, de koördinaosie d’r van is in hanen van Wikje Haan en Akkie Zeilstra.

DSC_5277

Femmie van Veen (links) lest veur in ukkespeulplak ”t Anlopien’ in Hooltpae. Ok koördinater Wikje Haan maekt dit gezellige gebeuren mit (foto: Lenus van der Broek)

 Behalven dat d’r uut et ni’jste Tomke-boekien veurlezen wodt, wodt d’r in disse kontreinen in die weke ok veurlezen uut de boekies ‘Muske Tiemen’ van Christine Mulder en ‘Muske en Fret’ van Herma Egberts. Et ni’je Tomke-boekien ‘Wat een keunst!’ is een uutgifte van de Afûk in Liwwadden en wodde in et Stellingwarfs vertaeld deur Sjoukje Oosterloo. ‘Tomke’ verscheen kotleden veur de achtste keer in et Stellingwarfs. De Stellingwarver Schrieversronte stelt alle jaoren veur alle Stellingwarver ukken een exemplaor van et boekien beschikber.

 

Voegelexkursie bi’j Appelsche, m.m.v. Ruurd Jelle van der Leij en Freddie de Vries

door

appelvink-2


Appelvinkien in Appelsche?

Foto: Ruurd Jelle van der Leij

Op zaoterdag 22 juni orgeniseert et pannekoekehuus De Oude Hof an de Boerestreek in Appelsche tegere mit de Stellingwarver Schrieversronte een biezundere aktiviteit. Die dag zal veural in et teken staon van de voegels die om Appelsche henne veurkommen (kunnen) én van ‘Et Stellingwarver Voegelboek’.. Et pergramme begint morgens om 10.00 ure mit koffie mit wat d’r bi’j en een inleidende powerpoint-prissentaosie over de voegelwereld in Stellingwarf, die deur de onderhaand laandelik bekende netuurfotograaf Ruurd Jelle van der Leij verzorgd wodden zal! Om 11.30 ure maeken de dielnemers o.l.v. Freddie de Vries, hi’j is de auteur van ‘Et Stellingwarver voegelboek’, een bustocht om Appelsche henne. Ien van de netuurgebieden zal beter bekeken wodden angaonde et veurkommen van de verschillende voegels daore.  Voegelkenner Freddie de Vries kan op een prachtige en kruderige wieze vertellen over dit zo interessaante onderwarp, dat de echte voegelliefhebber mag dit biezundere anbod aenlik niet missen!  Nao de exkursie  het de kok van De Oude Hof heerlike pannekoeken klaorstaon daor alle dielnemers onbeparkt van eten kunnen, mit daornao as naogerecht ies of koffie. Et hiele pergramme duurt tot omdebi’j vier ure.

De kosten veur disse unieke dag bin € 35,00 per persoon. Wie dit biezundere gebeuren mitmaeken wil, moet d’r as de kiepen bi’j wezen! Je opgeven kan tot 10 juni bi’j de Stellingwarver Schrieversronte in Berkoop. Dat kan deur te mailen naor info@stellingwarfs.nl, even bellen kan ok: 0516-451108. Nao et anmelden wo’n et definitieve pergramme en de nota naor jow toestuurd.

 

 

Aovend mit Douwe Kootstra en Johan Veenstra

door

Vanwegens de Friese boekemaond en de ofsluting van de Stellingwarver sutelaktie orgeniseren de Fryske Krite van Oosterwoolde e.o. en de Stellingwarver Schrieversronte op 20 september een gezaemelike kulturele aovend. Et wodt zonder twiefel een pracht van een aovend, want veur et pergramme zorgen de Friese schriever Douwe Kootstra en de Stellingwarver schriever Johan Veenstra. De beide schrievers bin al sund jaor en dag goed bevrund en wat de schrieveri’je en optredens angaot slim an mekaander waogd. Et wodt liekewel niet alliend daoromme een biezunder antrekkelike aovend. Behalven de beide schrievers treden ok op et muzikaole duo Sietske Sytsma (zang) en Rob Zandgrond (gitaar), zi’j brengen Stellingwarver en Friese lieties. Oflopen jaor deden Sietske en Rob nog mit an et lietiesfestival Stellingwarfpop en wunnen daor as et duo Rosey Kills de twiede pries.

De aovend die om acht ure begint is in aktiviteitencentrum De Miente in Oosterwoolde. De intree is € 5,00, kaorties kun now al besteld wodden bi’j et kantoor van de Stellingwarver Schrieversronte in Berkoop (0516-451108, info@stellingwarfs.nl).

GEEF JE OP VEUR STELLINGWARFPOP!

door

STELLINGWARFPOP OP ZAOTERDAG 9 NOVEMBER

Zoas eerder al ankondigd wodde is de zesde edisie van Stellingwarfpop op zaoterdagaovend 9 november. Et festival is dit keer binnen en dat is in et dörpshuus van Makkinge. Ondertussen hebben heur de eerste bands en singer-songwriters al anmeld en daor is de veurbereidende kemmissie vanzels ommeraek bliede mit. Tiedens et festival zal d’r ok een optreden wezen van de winners van Stellingwarfpop 2012, dat weren Serge Epskamp en Erwin van de Ven. Zi’j wunnen et festival doe mit et schitterende lietien ‘Laeste volle maone’.

DSC_2319

Serge Epskamp en Erwin van de Ven (links) wunnen Stellingwarfpop 2013 (foto: Lenus van der Broek)

Stellingwarfpop 2013 zal prissenteerd wodden deur Fons Herder uut Grunningen, mar van oorsprong van Oosterwoolde. Fons is veural bekend as zanger van de band ‘A liquid landscape’, een band die geweldig an de weg timmert. Tiedens et eerste Stellingwarfpop wun Fons mit Mukusha (een gelegendhiesfermaosie van him en zien meziekmaoten Niels en Robert van Dam), mit et prachtige, akoestisch uutvoerde  ‘Mooie dingen’  de twiede pries.

Op dit mement is ok de jury bekend, die bestaot krek as veurig jaor uut de leden Robert van Dam (uut Grunningen, bassist/gitarist ‘A liquid landscape’), meziekkenner/muzikaant Klaas Ozinga uut Makkinge en Peter Riksma (Zaandpol, neerlandikus en kenner van et Stellingwarfs, bestuurslid Stellingwarver Schrieversronte).

Om mitdoen te kunnen moet elke dielnemer op zien minst ien Stellingwarfstaelig lietien naor veuren brengen. Dat lietien moet oorspronkelik wezen, dat gelt niet alliend veur de tekst, mar ok veur de meziek. Vertaelings kommen niet in anmarking veur de priezen, mar meugen vanzels wel tiedens de optredens bruukt wodden. De priezen bestaon ok dit jaor weer uut drie geldpriezen: de eerste preis is € 250,00, de twiede € 125,00 en de dadde € 75,00.

Wie graeg mitdoen wil: je opgeven kan bi’j de Stellingwarver Schrieversronte in Berkoop. Dat kan deur even te mailen naor info@stellingwarfs.nl. Bellen kan ok, et tillefoonnr. is 0516-451108, dan even vraogen naor Sietske Bloemhoff.

 

Facebook event: https://www.facebook.com/events/172832882876548/

 

Geef je op veur STELLINGWARFPOP!

door

Ok dit jaor orgeniseert de Stellingwarver Schrieversronte opni’j et popfestival ‘Stellingwarfpop’. Et festival wodt in et naojaor holen, dit keer is et binnen. Daotum en plak bin nog niet bekend, mar wie mitdoen wil kan him now al anmellen bi’j de Stellingwarver Schrieversronte in Berkoop (info@stellingwarfs.nl, 0516-451108). Iederiene kan an et festival mitdoen, as d’r mar op zien minst ien Stellingwarfs lietien naor veuren brocht wodt. Dat moet dan wel oorspronkelik wezen, dus mit een eigen tekst en melodie. Niet alliend bands, mar bi’jglieks ok singer-songwriters of rappers kun an Stellingwarfpop mitdoen. Ok eerdere winners van et festival meugen mitdoen. Veur de beste drie dielnemers bin d’r opni’j mooie geldpriezen beschikber steld. Eerdaegs wo’n daotum en plak bekend maekt. In 2012 wun Serge Epskamp uut Zaandhuzen de eerste pries.