Tegen de 120 meensken maekten prachtige ienakteraovend in Blesdieke mit

Veur dit mooie fotoalbum van de ienakteraovend in Blesdieke zorgde Lenus van der Broek

Tegen de 120 meensken maekten prachtige ienakteraovend in Blesdieke mit

In de tot een echte tenielzael ommebouwde loods van mechanisaosiebedrief Demmink wodde oflopen zaoterdagaovend een prachtige ienakteraovend holen. Et gong alweer om de zeuvende ienakteraovend, die de Stellingwarver Schrieversronte dit jaor vanwegens zien 40-jaorig jubileum orgeniseert. Disse aovend was keuzen veur een wat ere opzet as de zes eerdere aovenden. Zo las veur et schoft de suksesvolle schriefster Sjoukje Oosterloo veur uut eigen wark. Zoe’n 120 meensken geneuten van heur vaeks humoristische verhaelen over daegelikse dingen, die veur veul meensken hiel herkenber bleken. Slim aorig was ok heur verhael over et kesteel van kesteelheer Gregorius dat in Blesdieke staot. Nao et optreden van Oosterloo was d’r een al even mooi optreden van singer-songwriter Serge Epskamp uut Zaandhuzen. Van him verscheen kotleden de prachtige cd ‘Oer’, mit daorop tien lieties in et Aachterhoeks, en daorvan leut Epskamp een flink tal heuren.

De prissentaosie was disse aovend in hanen van Schrieversronte-direkteur Sietske Bloemhoff, die o.e. heur grote wardering toonde veur mechanisaosiebedrief Demmink. Vanwegens et leeg- en schonemaeken en et inrichten tot een tenielzael kon de loods twie daegen niet deur et bedrief bruukt wodden. ‘Dat zoks in disse tied nog allemaole meugelik is, is echt fantastisch,’ neffens Bloemhoff. ‘Ok deur zoe’n inzet blift een dörp leefber en dat bliekt hier vanaovend in Blesdieke meer as.’

De Pollepraoters

Nao et schoft was et de beurt an de tenielspeulders van de Pollepraoters van Blesdieke zels. Zi’j brochten de kolderieke ienakter ‘De schriever veur et dörpsbelang’ naor veuren. Die ienakter, die indertied schreven wodde deur de Friese schriever Trinus Riemersma, vertelt et verhael van Gerben Turksma, hi’j is ankommend schriever. Nao de zaekelike vergeerdering van et Dörpsbelang lest Gerben et pebliek een stokkien veur uut eigen wark. En omreden hi’j een beginneling is hoopt hi’j op reaksies uut de zael. Now, en die krigt hi’j ommeraek! Aenlik vienen de meensken uut et dörp et hiele verhael van Turksma mar niks. De ien nao de aander levert kritiek en vint dat bepaolde passages uut et verhael schrapt wodden moeten. De kritische dörpsbewoners wodden ommeraek goed daelezet deur de speulders van Blesdieke, zodat de ienakter tot zien volle recht kwam. De ienakter wodde indertied vanuut et Fries in et Stellingwarfs ommezet deur Sjoukje Oosterloo.

De aovend wodde ofsleuten mit gezellige meziek van Easy-Eric, zodat de laeste Blesdiekigers dikke nao twaelven op huus angongen. Veul meensken gongen butendat mit een mooie pries naor huus, want de warkgroep Publiciteit van de Stellingwarver Schrieversronte had ok now weer veur een antrekkelike verlotting zorgd.

Zundag 13 jannewaori: Stellingwarver dienst in Berkoop

Op zundagmorgen 13 jannewaori is d’r in de karke van Berkoop een Stellingwwarver dienst. Domenee Rienk Klooster gaot veur in de dienst, die om half tiene begint. Et onderwarp van disse biezundere dienst is ‘Een ni’j begin maeken’. Veur dat onderwarp is keuzen naor anleiding van Mattheus 4: 12-25. De Stellingwarver dienst kan zien wodden as de ofsluting van et jubileumjaor van de Stellingwarver Schrieversronte.

Mooie literaire aovend mit Gerard Nijenhuis

 

Foto: Lenus van der Broek

Op vri’jdagaovend 30 november was d’r in et gebouw van de Stellingwarver Schrieversronte opni’j een literaire aovend. De bekende Drentse schriever Gerard Nijenhuis (1932) vertelde op een slim onderholende wieze over zien schrieveri’je, mar hi’j las ok veur uut zien laeste roman ‘De dag dat vader verdween’ (2010) en zien ni’jste dichtbundel ’80 gedichten’. In ‘De dag dat vader verdween’ wodt et verhael verteld van de jonge Hilbert, veur wie de Twiede Wereldoorlog begon doe zien heit mitneumen wodde deur de bezetter. Hilbert wodt dan van de iene op de aandere dag vertrouweling veur zien slim zieke mem, mar ok bondgenoot veur domenee en huusvrund Julius van Haaften. Veul van wat in et boek beschreven wodt is autobiografisch, zo vertelde Nijenhuis. Dit jaor verscheen ’80 gedichten’, een bloemlezing uut eigen wark, mit veertig gedichten in et Drents en veertig in et Nederlaans. Kotleden richtte Nijenhuis mit Albertien Klunder een ni’je Drentse schrieverskring op, naodat de veurige in 1996 deur reboelie opheven wodde. Tiedens et pergramme konnen ok vraogen steld wodden en daor wodde goed gebruuk van maekt. An et aende van disse biezunder slaegde aovend wodden deur flink wat meensken ien of meerdere boeken van Nijenhuis anschaft. De prissentaosie van de aovend wodde verzorgd deur Schrieversronte-veurzitter Ype Dijkstra.

Foto: Lenus van der Broek

Optreden Serge Epskamp en The Jetfarm

Kommende zaoterdagaovend 10 november treden Serge Epskamp en The Jetfarm op in kefé De Wiekslag in De Wijk in de perveensie Overiessel. De ‘singer-songwriter night’ begint om 21.00 ure, de toegang is gratis. Serge Epskamp wun Stellingwarfpop 2012 mit et lietien Laeste volle maone, dat in de rebriek ‘Beeld en geluud’ van disse webstee te heuren is. Ok The Jetfarm dee mit an Stellingwarfpop en leut daor twie prachtige lieties in et Stellingwarfs heuren, beide lieties zullen eerdaegs ok op StellingPlus te heuren wezen.