Om orgenisatorische redens kan de ienakteraovend in Raevenswoold (op 17 november) niet deurgaon. Et doel is dat de aovend now et kommende veurjaor holen wodt. Op disse webstee zal zo gauw meugelik te lezen wezen, wanneer as dat wezen zal!
De eerstvolgende ienakteraovend is op 24 november in Blesdieke.
Algemien
Kursus Stellingwarfs uut aende
Op maendagaovend 12 november gaot de beginnerskursus Stellingwarfs uut aende. Et is een kursus van tien lesaovenden, van half achte tot half tiene, die in et gebouw van de Stellingwarver Schrieversronte in Berkoop geven wodt. In de kursus is d’r ommedaenken veur et praoten, lezen en schrieven in en van et Stellingwarfs, mar d’r is ok andacht veur et wark van Stellingwarver schrievers, en bi’jglieks veur et laandschop en de historie.De pries is € 75,00, koffie en thee bin inbegrepen. Aj’ mitdoen willen: d’r is nog plak! Ie kun even bellen mit et kantoor van de Schrieversronte: 0516-451108.
Geld veur exkursieprojekt
Geld beschikber steld veur voegel-exkursieprojekt
Et roodvleugeltien (foto: Ruurd Jelle van der Leij)
Veur et orgeniseren kunnen van een speciaol voegel-exkursieprojekt veur de schoelekiender van Stellingwarf is deur ‘Groen en doen’ € 1000,00 beschikber steld. Et projekt wodt ontwikkeld vanwegens et verschienen van ‘Et Stellingwarfs Voegelboek’ van Freddie de Vries en Ruurd Jelle van der Leij. Kommend veurjaor zullen d’r deur vri’jwilligers een tal voegelexkursies holen wodden veur leerlingen van et Stellingwarver basisonderwies. As veurbereiding op die exkursies wodt et prachtige, zowat driehonderd bladzieden tellende, boek an alle basisschoelen in Stellingwarf beschikber steld.
‘Groen en doen’ is een pergramme dat opzet is deur et ministerie van Ekenomische Zaeken, Laandbouw en Innovaosie om vri’jwilligerswark op et gebied van netuur- en laandschopsbeheer an te vieteren.
Fotowedstried veur Stellingwarver schoelekiender
Fotowedstried veur schoelekiender van et basisonderwies in Stellingwarf
Vanwegens et 40-jaorig bestaon van de Stellingwarver Schrieversronte gaf de stichting dit jaor o.e. et boek De dörpen van Stellingwarf in oolde beelden uut. De Schrieversronte wil liekewel ok graeg foto’s van alle dörpen verzaemelen die now maekt wodden kund. En dan niet deur volwassenen, mar deur kiender van et basisonderwies. Daoromme wodde in et kader van et vak Hiemkunde in et basisonderwies een fotowedtried veur schoelekiender uutschreven. De wedstried wodde tiedens de jaorlikse hiemkundemiddag veur et basisonderwies op oflopen 19 september ankondigd.
Vlak nao de haastvekaansie is via alle basisschoelen an de kiender vraogd om an de wedstried mit te doen deur een foto te maeken van et eigen dörp. Mit de foto moet dudelik maekt wodden wat d’r zo biezunder is an dat dörp. De kiender meugen in een kotte bi’jheurende tekst heur keuze toelochten.
Een deskundige jury (mit o.e. de bekende jonge fotografen Marije Kuiper en Ruurd Jelle van der Leij) zal bepaolen wie per dörp in drie leeftiedskattegorienen de beste beeldbepaolende foto maekt het. Per dörp wodt daornaost iene winnende foto anwezen. De winnende foto’s van alle leeftiedskattegorienen zullen in 2013 in een speciaole expesisie te zien wezen. Alle negenendattig winnende foto’s per dörp zullen publiceerd wodden. De uutslag van de fotowedstried wodt rond 1 meert 2013 bekendmaekt.
Mooie boekemark bi’j The Readshop in Wolvege
Mooie boekemark bi’j The Readshop in Wolvege
Schrieversronte-vri’jwilligers Koosje Hornstra en Koop Oosterloo brochten hiel wat boeken an de man (foto: Lenus van der Broek). Eerder op de dag verkochten Albertha Zwaagstra en Geert van der Meulen al een sleep boeken.
Behalven dat de mark een mooi verkooprisseltaot opleverde, was et ok nog es een gezellige gebeuren daor bi’j The Readshop in Wolvege! (Foto: Lenus van der Broek)
Zaoterdag 27 oktober was de twiede mark mit twiedehaans boeken die de Stellingwarver Schrieversronte dit jaor orgeniseerde. Krek as een maond eerder bi’j Bruna in Oosterwoolde et geval was, wodde ok disse mark weer een veural genoeglike aktiviteit mit een mooie opbrengst. Ok now kregen weer een hiele vracht boeken een ni’je eigener, en da’s gien wonder, want veul inbrengers hadden veur een prachtige verscheidenhied an boeken zorgd. Veul Stellingwarvers zullen daoromme beslist gien muuite hebben om dit extra lange weekaende mit de overgang van de zommertied naor die van de winter deur te kommen!
In december zullen de laeste boeken die veur de aktie inbrocht binnen te koop wezen in et ‘winkeltien’ van de Schrieversronte in Berkoop. Wanneer dat percies wezen zal wodt nog bekend maekt, o.e. op disse webstee!
De opbrengst van de marken is mit naeme bedoeld om alle jubileumaktiviteiten van de jaorige stichting uut Berkoop mit meugelik te maeken.