Flitskursus: Stellingwarfs leren in iene dag!

Kan dat? Et leren van een tael in iene dag? Now, hielemaole flitsend zuj’ d’r nao zoe’n dag nog niet mit ommegaon kunnen, mar in iene dag kuj’ wél hiel wat van een tael leren. Vandaor dat de Stellingwarver Schrieversronte op zaoterdag 17 feberwaori een ‘Flitskursus Stellingwarfs’ orgeniseert!

De kursus is bedoeld veur meensken die et Stellingwarfs niet machtig binnen en graeg mit et schrieven én praoten d’r van an de gang willen. De Flitskursus is ok bedoeld veur meensken die et deur de weke niet an tied hebben om kursussen te volgen.

De kursus wodt holen in Berkoop,  en begint morgens om tien ure. Tot twaelf ure is d’r dan andacht veur de spelling en de grammatika van et Stellingwarfs. Dit onderdiel zal geven wodden deur dr. Henk Bloemhoff, taelkundige en saemensteller van et Stellingwarfs Woordeboek. Et middagdiel is van 13.00 tot 15.00 ure, dan is d’r veural ommedaenken veur kreatief schrieven, mar evt. ok veur et praoten en et daegelikse gebruuk van et Stellingwarfs. Dat onderdiel wodt verzorgd deur Sietske Bloemhoff.

De Flitskursus wodt geven in et gebouw van de Stellingwarver Schrieversronte in Berkoop, de kosten bin € 20,00 per persoon, koffie en thee inbegrepen. Opgeven kan via de mail info@stellingwarfs.nl, bellen kan ok naor et kantoor: 0516-451108 (van maendag t/m donderdag).

Kursus: We leveren je een streek

Lende, 8 meert 15

De kursus We leveren je een streek is veural bedoeld veur meensken die nog niet zovule weten over de streek waor ze wonen, mar die d’r wel graeg wat meer van weten willen zollen. Daoromme kommen in disse kursus verschillende onderwarpen in et kot an bod, zodaj’ mit al die mooie onderwarpen even in anraeking kommen. De kursus bestaot uut drie aovenden en een exkursie. Op elke kursusaovend, die twie uren duurt, kommen twie onderwarpen an bod. Die onderwarpen bin: de vroegste geschiedenis van Stellingwarf, de geschiedenis van et laandschop, de dörpen van Stellingwarf, de netuur van Stellingwarf, de Stellingwarver streektael en Stellingwarver literetuur. De exkursie is naor een Stellingwarfs netuurgebied mit as exkursieleider Freddie de Vries.

De kosten bin € 45,00 per persoon, koffie/thee inbegrepen.

De daotums van de kursus bin:

Deensdagaovend 4 oktober (van 19.30 tot 21.30 ure):

  1. Algemiene geschiedenis, deur Geert Lantinga
  2. De geschiedenis van et Stellingwarfs, deur dr. Henk Bloemhoff

Deensdagaovend 11 oktober (van 19.30 tot 21.30 ure):

  1. De dörpen van Stellingwarf, deur Sietske Bloemhoff
  2. Stellingwarver proza en poëzie, deur Peter Riksma

Deensdagaovend 18 oktober (van 19.30 tot 21.30 ure):

  1. De geschiedenis van et laandschop, deur drs. Dennis Worst
  2. De netuur van Stellingwarf, beeldreportage deur Ruurd Jelle van der Leij

Zaoterdagmorgen 29 oktober (van 9.00 tot 11.30 ure):

Exursie in een Stellingwarfs netuurgebied, o.l.v. Freddie de Vries

Bi’j interesse kuj’ et beste even bellen mit et kantoor van de Schrieversronte: 0516-451108, of mailen naor: info@stellingwarfs.nl.

(Foto: Sietske Bloemhoff)

Kursus Stellingwarfs in de Hoolten Klinte

‘Bi’j’ bi’j de beien of bi’j’ bi’j de bi’jen?’

Dit naojaor zorgt de Stellingwarver Schrieversronte opni’j veur een zunnig anbod van kursussen Stellingwarfs en Stellingwarver streekkultuur! Zo kun meensken, die graeg mit et schrieven van et Stellingwarfs an de slag gaon willen zol, en meer over de aachtergrond van disse mooie Nedersaksische tael weten wil, van ’t haast mitdoen an de kursus ‘Stellingwarfs veur beginners’.

Beien of bi’jen

Et lezen van et Stellingwarfs gaot zowat alle meensken goed of, mar et schrieven d’r van is een aander verhael… Dat leer ie veural deur et vule te doen en deur d’r mit mekeer mit an de gang te wezen. Behalven daj’ bi’j disse kursus aorig in de weer binnen mit de schrieveri’je, is d’r ok ommedaenken veur et praoten in et Stellingwarfs. Ok veur de biezundere geschiedenis en ligging van et gebied is d’r andacht.

Hoolten Klinte

De kursus wodt geven in de Hoolten Klinte in Appelsche, i.s.m. de Historische Verieninge Appelsche e.o. De kursus ‘Stellingwarfs veur beginners’ bestaot uut zes lesaovens van de hieltied twie uren en wodt geven deur dr. Henk Bloemhoff (Oosterwoolde), Geert Lantinga (Wolvege) en Mark van Veen (Wolvege). De daotums bin: maendag 14, 21 en 28 november en 9, 16 en 23 jannewaori, aovens van 19.30 – 21.30 ure. De pries is € 60,- (inkl. kursusmateriaol en koffie/thee). As ofsluting is d’r o.l.v. Geert Lantinga in et veurjaor een exkursie in een Stellingwarfs netuurgebied.

Meensken die interesse hebben kun et beste even bellen mit et kantoor van de Schrieversronte: 0516-451108, of mailen naor: info@stellingwarfs.nl.

Kursus Stellingwarfs ofsleuten

Exk Sch.dobbe   Exkursie meie 2016, Schaopedobbe

Mit een unieke exkursie in et netuurgebied bi’j de Schaopedobbe in Else wodde kotleden de kursus ’Stellingwarfs veur beginners’ ofsleuten. Exkursieleider was Geert Lantinga, die ok mit riegelmaot exkursies leidet veur It Fryske Gea, van wie et netuurgebied is. Tiedens de exkursie vertelde Lantinga over de biezunderheden en et ontstaon van dit prachtige stokkien Stellingwarf, waor lange leden de schaopen wusken wodden.

De kursus zels wodde dit jaor holen in De Hoeve, zeuven meensken deden d’r an mit. An et aende van de exkursie rikte Lantinga de kursisten een ‘Bewies van mitdoen’ uut. De kursusleiding beston veerder uut Henk Bloemhoff en Mark van Veen. Et doel is dat de kursus in november opni’j uut aende gaon zal, dit keer in Appelsche in de Hoolten Klinte, et gebouw van de Historische Verieninge.

Ofsluting kursus Laandschopsgeschiedenis Der Izzerd en omgeving

laandsch. 24-5-16

Mit mekeer op ’e fiets deur et dörpsgebied van Der Izzerd, Oolde- en Ni’jhooltwoolde, zo wodde  op deensdagaovend 24 meie de kursus Laandschopsgeschiedenis, die dit veurjaor in Der Izzerd holen is, ofsleuten. Tiedens de fietstocht was d’r ommedaenken veur de ontstaonsgeschiedenis van et laandschop en de kultuurhistorische elementen die daor nog in weeromme te vienen binnen. Zo wodden o.e. de ‘poolder’ van Der Izzerd, et oerdal van de Oolde Kuunder en et oolde karkhoffien van Hooltwoolde opzocht. Via de Heirweg (Ni’jhooltwoolde) gong et an op ’e Scheene, die de greens vormt tussen Der Izzerd en Hooltpae. Kursusleider Dennis Worst leut tiedens de tocht o.e. zien hoe hi’j grondborings uutvoert en wat zoe’n onderzuuk je as onderzuker vertellen kan. Zo blieken d’r onder de ophoging van de karkeheuvel op et oolde karkhof van Hooltwoolde nog resten vene te zitten (zie foto). An de haand daorvan vertelde Worst de kursisten ien en aander over et laandschop zoas dat d’r in de twaelfde of dattiende ieuw uutzien hebben moet, doe wodde de karke op dat plak sticht.

Et doel is dat de Stellingwarver Schrieversronte in 2017 opni’j een kursus Laandschopsgeschiedenis anbieden zal, mar dan weer in een eer Stellingwarfs dörp.

Dennis an et boren, 24516

Dennis Worst dot een grondboring op et oolde karkhof van Hooltwoolde.

Foto’s: Joop Sanders