Stellingwarfs veur beginners

Kursus Stellingwarfs

Et doel is dat d’r in feberwaori in Berkoop een ni’je kursus ‘Stellingwarfs veur beginners’ uut aende gaon zal. Of et lokken gaot hangt vanzels van de situaosie rond corona of. Ni’js over de kursus volgt in de Stellingwarver kraanten en op ’e social media van de Sschrieversronte.

   Intied is de kursusleiding uutbreid mit Elizabeth Bergsma uut Drachten, mar van oorsprong van Else. Elizabeth, die een peer jaor leden zels twie kursussen Stellingwarfs volgde, is gien onbekende op dit gebied. Zo verzorgt zi’j de laeste jaoren ok de warkwinkel Stellingwarfs binnen et hiemkundeprojekt ‘De Veerkieker’.

   De ere beide kursusleiders bin Ageeth Bos (Steggerde) en Mark van Veen (Wolvege).  

Kursus Stellingwarfs veur beginners gaot op 11 november uut aende in Oosterwoolde

Oflopen kursusseizoen wodde in de biebeltheek van Wolvege de kursus ’Stellingwarfs veur beginners’ mit veul sukses holen. Mar liefst 11 meensken volgden disse kursus, en zi’j gavven heur ok zowat allemaole op veur de ‘verdiepingskursus Stellingwarfs’, die dit naojaor in Berkoop geven wodden zal. De ni’jste beginnerskursus zal et kommende kursusseizoen geven wodden in Oosterwoolde, in de ruumte van et Comprix College (Kampingerhof 2). Tiedens de beginnerskursus is d’r mit naeme ommedaenken veur et schriftelik gebruuk van disse kotleden erkende Nedersaksische tael, mar ok veur et praoten d’r van. Daornaost zal d’r over de tael en de oorsprong d’r van uutleg geven wodden.

   De kursus bestaot uut zes lesaovenden. De kursus zal dit keer op maendagaovend geven wodden, drie keer in november (9, 16 en 23); en drie keer in jannewaori (13, 20 en 27). De pries van de kursus is € 75,00, inkl. kursusmateriaol en koffie/thee. De kursusleiding bestaot dit keer uut Ageeth Bos (Steggerde), dr. Henk Bloemhoff (Oosterwoolde) en Mark van Veen (Wolvege).

   As ofsluting is d’r in et veurjaor een exkursie in een Stellingwarfs netuurgebied o.l.v. Freddie de Vries uut Hooltpae. Veur meer infermaosie kan kontakt opneumen wodden mit et kantoor van de Stellingwarver Schrieversronte in Berkoop. Dat kan tillefonisch (0516-451108), dan even vraogen naor Sietske Bloemhoff. Mailen kan liekewel ok, en het alderdeegst de veurkeur! Dat kan dan naor info@stellingwarfs.nl.

Fleurig aende kursus Stellingwarfs

Op de foto, veuran, v.l.n.r.: kursisten Miranda van der Vegt, Elizabeth Bergsma, Marian Jansen, Afra Wamsteker; boverste riegel v.l.n.r. kursusleider Mark van Veen; kursisten Jan Mulder, Wesley Veen, Johan Jansen, Roelof Bakker, Albert Slagter; SSR-bestuurslid (siktaoris) Hendrik Fokkema en  kursusleider Henk Bloemhoff. Kursist Bertus v.d. Akker was verhinderd. (Foto: Lenus v.d. Broek)

Mit een alderfleurigste bi’jienkomst wodde donderdagaovend 24 jannewaori de jongste kursus Stellingwarfs ofsleuten. Dat gebeurde in et vaaste lesplak van dit seizoen, de Eupenbaore Biebeltheek van Wolvege. De ‘kursus Stellingwarfs I’ hul disse keer zes lesaovenden van twie lesuren in. De lessen wodden verzorgd deur de kursusleiders Mark van Veen (Wolvege) en Henk Bloemhoff (Oosterwoolde).

Et gaot d’r in dit soorte van beginnerskursus omme et Stellingwarfs beter onder de kni’je te kriegen. De naodrok kwam disse keer stark op et schrieven van et Stellingwarfs te liggen, ok omreden haost alle kursisten van huus uut Stellingwarfs praoten en et lezen mar hiel zelden een perbleem is. Liekewel kreeg dat onderdiel ok et neudige ommedaenken, omreden luudop lezen helpt bi’j et goed uutspreken en omdat veul lezen helpt bi’j et vaasteholen van et goeie woordbeeld. En daor hej’ netuurlik baot bi’j aj’ et Stellingwarfs schrieven.

In de lessen is an de haand van een powerpoint veul ommedaenken geven an spelling, uutspraoke, woordgebruuk en grammatika, et laeste veural veur wat de oddering van de warkwoorden betreft.  Een biezunder ommedaenken kreeg hoe aj’ et ien en aander in hulpmiddels opzuken kunnen (haandwoordeboek, boek ‘Schrijf je ’t Stellingwerfs’, ‘Taal in Stad en Land: Stellingwerfs’ en digiveurzienings op stellingia.nl en stellingplus.nl). D’r is warkt mit opzuukoefenings, invullen van muuilike vormen in zinnen en veerder mit diktees.

Meer praoten, meer schrieven, et Stellingwarfs zichtberder maeken in opschriften – ok dat weren onderwarpen die  ommedaenken kregen. Disse kursisten hadden meerst uut heurzels al belangstelling veur Stellingwarver verhaelen, gedichten en romans, of bin die belangstelling now dudelik an et ontwikkelen. Ok historische boeken, al of niet in et Stellingwarfs, hadden ze aorighied an. De geschiedenis kreeg in disse kursus mit naeme ommedaenken in de vorm van et ontwikkelen van een eigen Kanon van Stellingwarf. Op dat punt zal nog warkt wodden an een vervolg. Et zal de kursusleiding ok bepaold niet verbaozen as de oold-kursisten dommiet gauwachtig es een verhael of gedicht publiceren in bi’jglieks et tiedschrift De Ovend. De kwaliteiten daorveur lieken d’r te wezen.

In april is d’r nog een soorte van ofslutende exkursie naor een netuurgebied in Stellingwarf, zoks onder leiding van netuurkenner Freddie de Vries van Hooltpae. Dan kriegen de kursisten ok heur ‘Bewies van mitdoen’ an disse kursus. 

Ofslutend op disse laeste aovend voerde Schrieversronte-bestuurslid Hendrik Fokkema nog even et woord. Hi’j sprak zien wardering veur de belangstelling van de kursisten uut en  nuumde nog even dat de Stellingwarver Schrieversronte meer in huus het dat veur heur de muuite weerd wezen kan. In dat verbaand wees hi’j d’r ok op dat et beeld dat vroeger wel beston: ‘een klein lekaol gebeuren’ al lange niet meer klopt. Et tael- en kultuurinstituut Stellingwarver Schrieversronte het leden en ondergaot belangstelling niet allienig in de regio Stellingwarf en omgeving, mar ok van veer daorbuten. Levend bewies is iene van disse kursisten. Zi’j bezocht de bi’jienkomsten in Wolvege van Amsterdam uut.  

Kursus ‘Stellingwarfs veur beginners’ uut aende

  

Mar liefst elf kursisten bin in Wolvege uut aende gaon mit de kursus ‘Stellingwarfs veur beginners’. Tiedens die kursus is d’r mit naeme ommedaenken veur et schriftelik gebruuk van disse kotleden erkende Nedersaksische tael, mar ok veur et praoten d’r van. Daornaost wodt d’r over de tael en de oorsprong d’r van uutleg geven.

De kursus wodt geven in de biebeltheek en bestaot uut zes lesaovenden. De eerste drie aovenden bin in november, de laeste drieje in jannewaori. As ofsluting is d’r in et veurjaor een exkursie in een Stellingwarfs netuurgebied. Disse exkursie zal verzorgd wodden deur Freddie de Vries van Hooltpae.

De kursusleiding bestaot dit keer uut dr. Henk Bloemhoff (Oosterwoolde) en Mark van Veen (Wolvege).

(Foto’s: Lenus v.d. Broek)