Stellingwarfs in et ‘wild’

Oflopen vri’jdag 24 en zaoterdag 25 was d’r as onderdiel van et 65ste dörpsfeest van De Blesse-Peperge een optocht mit versierde waegens. Op twieje hiervan stonnen Stellingwarver opschriften. Zo weren Wiepie en Appie 36 jaor laank de keféhoolders van kefé De Schouw in De Blesse, mar dit is onderwiels as woonhuus verkocht. (Foto en tekst: Henk Jager)

De Meerdiek kuj’ op ’e Hoeve vienen. Et is gien officiële straotnaeme, mar de naeme van een menninge naor een huus toe dat an de Jokweg staot. (Foto en tekst: Johan Veenstra)

Overal wodt vandaege-de-dag bier maekt. In de Stellingwarven wodt dat ok daon. De Heer’n van Stellingwarf is neffens et etiket op et flessien een biertie dat maekt wodt in Bierbrouweri’je Wolvege. Ik schrieve altied Heren en biertien. Mar toe dan mar. Bier drink ik trouwens niet. (Foto en tekst: Johan Veenstra)

Tiedens et dörpsfeest van Hooltpae zag ik dit bod bi’j een huus staon. Ik hebbe gien foto van et betreffende huus maekt. Ik wil graeg diskreet blieven. Et kan wezen dat dat kwaoie wief in dat huus woont. Kwaod mit ao en niet mit oa. Kwaod kan negatief wezen, mar et hoeft niet. Een kwaod wief kan een aekelik, lelk wief wezen. Mar et kan ok een oppassend wief wezen dat goed mit de centen ommegaon kan. (Foto en tekst: Johan Veenstra)

Johan Veenstra zag een schoffien leden de naeme De Krimpe op een huus an de Frieseweg in Blesdieke staon; zie nr. 328 van disse serie. Et is liekewel ok de naeme van een redelik ni’je ni’jbouwstraote in Ooldemark. Eerder laggen hier deur boswallegies begreensde kaampen. Bi’j disse straote lag (neffens topotijdreis) eerder een smaller perceel drekt aachter een brieder perceel (zie foto). Vermoedelik slat de naeme daor op; et gaot om een veldnaeme dus. (Foto en tekst: Henk Jager)