Stellingwarfs in et ‘wild’

Fotorebriek Stellingwarfs in et eupenbaor

368. www.tiedzat.nl

door

Tiedzat is de mooie naeme van de ooldejaorsploeg van Zorgvlied. Behalven dat de ploeg veur aorige aktiviteiten zorgd rond de jaorwisseling doen de leden meer. Zoas te zien is op dit bod, waorvan Hans Salverda uut Zorgvlied een foto maekte: op 18 juni hul Tiedzat de ‘Trekkerbehendigheid Zorgvlied’. Een weke laeter is d’r trouwens ok veul te doen. Op zaoterdag 25 juni is d’r de zoemerfair van Ni’jberkoop, de TT in Assen, mar bovenal:

NOW ZAOTERDAGMIDDAG 25 JUNI IS ET GROTE FEEST VAN DE STELLINGWARVER SCHRIEVERSRONTE VANWEGENS ZIEN 50-JAORIGE BESTAON. IEDERIENE IS VAN HATTE WELKOM VANOF IEN URE IN EUPENLOCHTTHEATER DE KOELE IN APPELSCHE!

367. Ik roke deur…

door
Bi’j een niet onbekende Stellingwarver schriever in Hooltpae zag Hans Salverda tiedens zien fietstocht disse weke ok een peer bodden mit opmarkelike teksten in die zien tuun. En een vrommesien op een toolter. An weerskaanten van heur is et volgende te lezen: Ik roke deur tot ik d’r bi’j daele vaal, en de rook me de oren uutkomt!!! En op et ere: Pakkien sigaretten 40 euro!!! Tsja, wat zol hier now dan toch aachterzitten, zoj’ zeggen. Wie et wet mag et zeggen!

366. Zoepen poepen en…

door

Oflopen weke fietste Hans Salverda uut Zorgvlied deur et eers toch zo nette dörp Hooltpae. Mar hi’j rolde zuver van de fiets of doe hi’j op een bodpepieren bod de tekst Zoepen poepen en op de proeme kroepen staon zag! Hi’j maekte liekewel wél gauw een foto veur de rebriek Stellingwarfs in et ‘wild’, waorvan de naeme now een wat ere uutleg kriegen kunnen zol.

365. ’t Olde Plietsiebero

door
An de Twiegstraote in Noordwoolde ston op dit plak eerder grif et oolde pelisieburo. Ok al is op et bottien de anduding in et Stellingwarfs wat eers schreven as op ‘e gebrukelike wieze, et is vanzels hiel mooi dat op disse wieze de herinnering zichtber blift. (Foto’s en gegevens: Hans Salverda)

364. Ni’je Brink

door

Kotleden wodde in Else een bottien plaetst mit de mooie naeme Ni’je Brink. Zoks gaot vanzels in Else niet zomar, want et bod mos neffes oold gebruuk ok deupt wodden mit Lendewater. De brink is te vienen op ‘e hoeke van de Heufdweg en de Frankenaweg. Een brink is van ooldsher bedoeld as plak waor meensken gezaemelik mit mekere dingen ondernemen of gewoon evenpies bi’jpraoten. D’r staon daoromme ok noflike baanken bi’j et keunstwark ‘Door en voor’ dat eerder plaetst wodde as wardering veur alle vri’jwilligers in Else; en die bin d’r in dat smoeke dörpien hiel veul! (Foto en gegevens: Hendrik Betten)