Stellingwarfs in et ‘wild’

Venekoten heurt niet tot de ooldste buurtschoppen bi’j Oosterwoolde. Mar de naeme wodde al wel in 1543 nuumd, en al veul en veul moet d’r in dit gebied bewoning west wezen. Dat bleek doe d’r hier in 1933 zaand wunnen wodde en d’r een tal bleien en klokbekers vunnen wodde deur anneteur-archeoloog Jan Hendrik Popping.

Van alle buurtschoppen van Oosterwoolde bin now de infobodden mit teksten in et Stellingwarfs in disse rebriek plaetst. Van iene nog niet. En dat kan ok (nog) niet, want bliekber is indertied et infobod veur die buurtschop vergeten. Om welke buurtschop et gaot? Jardinge! En laot daor now krek de veurzitter van de SSR wonen… Hi’j zal d’r wark van maeken, het hi’j kotleden angeven… Want dat dit zo niet kan, daor weren we et vanzels mitien over iens! (Foto’s en tekst: Sietske Bloemhoff)

’t Is laeter daj’ daenken. Mit disse wieze spreuk op heur auto en caravan ridt et echtpeer Dol van De Langelille rond. Een mooie menier om oonze Stellingwarver tael uut te dregen. Dat schrift Annie Dedden bi’j de foto’s die ze disse weke stuurde. En zo is et mar krek, vienen jim ok niet? Een hiel arg mooi initiatief! Wie volgt?

Begin april zag Henk Jager in Tuk disse auto mit de Stellingwarver naeme Mien plekkie en maekte daor disse foto van. Gewoonlik bruken we in et Stellingwarfs et woord ‘plakkien’, mar de kaante van Blesdieke, en veerderop zoas in Tuk en Stienwiek, wodt ok vaeke ‘plekkie’ zegd. De auto is van de dagbesteding veur dementerenden in Stienwiek.

Jan van Drogen uut Wolvege zag dit bod in Stienwiekerwoold. ’t Krullebossie wodde jaoren leden deur een enthousiaste groep vri’jwilligers opni’j ontdekt en opknapt. Op dit mement wodt d’r drok warkt an een ‘ontdek-keboolterpad’. (Foto: Jan van Drogen, tekst: Annie Dedden)

Et echtpeer André en Henriëtte Otten van Blesdieke wodde deur de buurt verrast mit dit prachtige spandoek!

(Foto en tekst: Annie Dedden)