De Lende bi’j Steggerde (foto: Sietske Bloemhoff)
In de eerste Ovend van dit jaor is d’r mitien veul ommedaenken veur et thema dat disse jaorgang een belangrieke rolle in dit ienige Stellingwarver tiedschrift speult. Dat thema is de revier De Lende en daor zal deur et jaor jenne op alderhaande wieze ommedaenken veur wezen. In et feberwaorinommer vertelt Geert Lantinga van Wolvege over de geschiedenis van de revier en beschrift Pieter Dijkstra uut Appelsche zien herinnerings an De Lende in et westelike pat van Stellingwarf waor hi’j opgruuide. Annie Ligthart van Oosterwoolde mag ommeraek graeg schilderen, en ze dot dat veerweg et liefste bi’j De Lende in Steggerde: redakteur Jannes Westerhof praot mit heur in ‘Dir plak dot me wat’. Mar d’r kommen vanzels ok aandere onderwarpen an bod: Rienk Klooster zorgt veur zien dadde oflevering over verdwenen of oolde karkhoffies in Stellingwarf, dit keer gaot et over dat van Blesdieke. ‘In Helsinki is et now dan eindelik koold,’ vertelt Carolien Hunneman, die alle twie maonden over heur ni’je leven in de Finse heufdstad vertelt. Ze het et now mit naeme over heur wark daor as trener van de Finse jeugdschaetsploeg. In meert dot Carolien heur ploeg trouwens mit an een internationaole wedstried in Thialf. De dadde oflevering van et spannende Nedersaksische vervolgverhael ‘De oflevering’ is schreven in et Aachterhoeks van Derk Jan ten Hoopen, die woonachtig is in et Drentse Zuudwoolde.
De Ovend is los te koop bi’j Bruna Oosterwoolde, The Readshop in Wolvege en de Stellingwarver Schrieversronte in Berkoop, veur € 3,75. Leden van de Stellingwarver Schrieversronte kriegen et blad ommenocht toestuurd.