Info

Wat is StellingPlus?

 

StellingPlus is …

de jong(st)e webstee van de Stichting Stellingwarver Schrieversronte in Berkoop. Die stichting is al meer as 40 jaor drok in de weer om d’r veur te zorgen dat de Nedersaksische streektael et Stellingwarfs niet alliend beweerd blift, mar veural ok tot in lengte van jaoren levendig bruukt wodt.

StellingPlus is …

daoromme ok mit naeme bedoeld om meensken an te vieteren om (meer) mit et Stellingwarfs an de gang te wezen. En dat kan vanzels op een hieleboel menieren, veur de haand liggende, mar ok veur de wat minder veur de haand liggende. Et is an jow om daor wat van te vienen en uut te kiezen:

  • et daegeliks gebruuk van et Stellingwarfs wat et praoten d’r van angaot, niet alliend thuus, mar ok onderwegens, in de winkel, bi’j de buren, op schoele, op et wark en gao mar deur.
  • et mit riegelmaot lezen van et Stellingwarfs: boeken, stokkies in de kraanten, verschillende websteden, kelinders, post, mailberichten, twiets en gao mar deur.
  • et schrieven in et Stellingwarfs en daenk dan niet alliend an verhaelen en gedichten en zo. De hieltied meer meensken schrieven heur mailberichten in et Stellingwarfs, mar twitteren ok in die tael, plaetsen adverteensies in de eigen tael en gao mar deur.

StellingPlus is …

een webstee daor iederiene die wil gebruuk van maeken kan:

  • ie zien d’r allegere aorige onderwarpen op daor aj’ misschien zels ok mit an de slag willen.
  • ie vienen d’r de hieltied ni’je verhaelen en gedichten op van meensken die al langer of kotter in et Stellingwarfs schrieven.
  • ie zien d’r prachtige foto’s op van jonge, telentvolle Stellingwarver fotografen zoas Marije Kuiper en Ruurd-Jelle van der Leij.
  • ie vienen d’r de hieltied meer oefenings en spullegies op om je et Stellingwarfs eigen te maeken.

Kotomme: kiek en vien dat waj’ zuken in de verschillende rebrieken!

Hej’ een mooie bi’jdrege veur StellingPlus? Mail die dan naor info@stellingwarfs.nl, de mitwarkers bepaolen et wel of niet plaetsen d’r van. Wel even je naeme en adres d’r bi’j vermellen, eers wodt je wark an de kaante legd…

Veur hiel vule aachtergronden over et Stellingwarfs en de Stellingwarver Schrieversronte zoj’ ok es even op www.stellingwarfs.nl kieken moeten.

Et gebouw van de Stellingwarver Schrieversronte in Berkoop

Share