De Stellingwarver Schrieversronte geft begin volgend jaor een mediaboekien uut mit Stellingwarver verhaelen en lieties. Et mediaboekien is veural bedoeld veur de ooldere inwoners van Stellingwarf, die in zorgtehuzen of verpleeginstellings wonen en die niet veul meer buten de deure kommen. Et mediaboekien is koppeld an et veurleesprojekt veur oolderen zoas dat al een stokmennig jaoren lopt, en dat now veerder uutbreided wodden zal. De jaorlikse veurleesaktie veur oolderen is in de wintertied, en zal disse winter begin feberwaori wezen. Een groep van zoe’n twintig vri’jwilligers gaot in die winterveurleesweke naor alle Stellingwarver zorginstellings en verpleeghuzen en naor De Menning in Wilhelminaoord. Veur de kommende keer zal ok de Thuuszorg benaoderd wodden om ok oolderen die nog wel thuuswonen kunnen in et projekt te betrekken. Et mediaboekien zal in de veurleesweke an alle zorginstellings uutdield wodden, zodat de bewoners ok buten de veurleesweke omme naor Stellingwarver verhaelen en lieties luusteren kunnen. Veur et hiele projekt krigt de Stellingwarver Schrieversronte belangrieke financiële ondersteuning van Stichting Bercoop Fonds.
Femmie van Veen lest veur in Wilgenstede in Wolvege (foto’s: Lenus v.d. Broek)
Verhaelen
Veur de verhaelen die op de cd kommen, wodde deur de Sietske Bloemhoff een selektie maekt. Zo zal Femmie van Veen (Hooltpae) verhaelen inlezen gaon van Hendrik Johannes Bergveld en Klaas Dijkstra (Langedieke) lest een tal verhaelties veur uut et boekien ‘Daegelikse dinkies’ van Klaas van der Weg (1916-1995). Oflopen 6 november vertelde Johan Veenstra (Ni’jhooltpae) al twie verhaelen uut zien bundel ‘Lamert en Lutske’. Alle verhaelen en lieties veur de cd wo’n allemaole opneumen in de studio van Serge Epskamp in Zaandhuzen.
Lieties
Ok al wodt de cd al slim ofwisselend deur de verschillende verhaelen en de verschillende veurlezers, d’r wodt ok zorgd veur een drie- tot viertal lieties. Daorveur is Henk Bloemhoff benaoderd; hi’j zal een peer bekendere, mar ok een wat onbekender lied van himzels inzingen.
Mediaboekien
De cd, die roem een ure duren zal, komt in een zonuumd mediaboekien. In dat boekien, dat 24 bladzieden tellen gaot, kommen behalven infermaosie over de verhaelen en vertellers ok biezundere aorigheden / aorige biezunderheden over de Stellingwarver regio. Veur de vormgeving van et mediaboekien zorgt Alain ter Schuur van 24BIT in Wolvege. Et mediaboekien mit cd zal ok in de losse verkoop kommen en kost dan € 10,00.