Ni’js – Pagina 161 – StellingPlus.nl

Eerste twie routegidsen ‘Fietsen door het stroomgebied van De Lende’ verschenen

28 augustus 2016 door Redaktie

De drie routes ‘Fietsen door het stroomgebied van De Lende’ laoten je van alle moois dat in et gebied te vienen is genieten! Foto’s: Geert Lantinga

Vlak veur de jaorlikse sutelaktie van de Stellingwarver Schrieversronte verschenen de eerste twie dielen van de routegids ’Fietsen door het stroomgebied van De Lende’. Et dadde en laeste diel van disse biezundere fietsroutes verschient laeter dit jaor tiedens een biezundere prissentaosie. De serie wodt schreven deur Geert Lantinga van Wolvege, hi’j is kenner van et Lendegebied bi’j uutstek. Et eerste diel van de serie gaot deur et gebied tussen Tronde en De Hoeve en is 40 km; et twiede diel beschrift de route tussen De Hoeve en Blesdieke en is 36 km. Diel 3 gaot deur et wesstelike diel van et stroomgebied van de revier en is 45 km. De routes sluten goed op mekeer an; et is meugelik om van de iene fietsroute veerder te gaon mit de volgende. De gidsen, die Nederlaanstaelig binnen, bin op busefermaot en tellen elk 64 bladzieden. Ze bin veurzien van veul kultuurhistorische infermaosie en unieke foto’s. In de omslaegen, die as uutklapt wodden kund, bin gebiedskaorties van de routes opneumen.

Eerder zorgde Lantinga al veur de routegidsen ’Kuieren in en om Wolvege’ en ’Langs oolde en ni’je hooltpaeden’. Mit de Lende-routegidsen komt de suksesvolle serie van de Schrieversronte now op tiene. De stichting is van plan en geef in 2017 opni’j twie routegidsen uut.

De ni’je routegidsen kosten € 8,50 et stok en bin bi’j de grotere boekhaandels, tiedens de sutelaktie en bi’j de SSR in Berkoop te koop.

Sutelaktie begint op 29 augustus

28 augustus 201621 augustus 2016 door Redaktie

De sutelders te gaaste bi’j Lutz Jacobi in Den Haag (Foto: Lenus van der Broek)

Sutelaktie SSR begint 29 augustus

Berkoop. Ankem maendag 29 augustus begint in de dörpen De Haule en Donkerbroek de jaorlikse sutelaktie van de Stellingwarver Schrieversronte. Tiedens die aktie wo’n mit naeme de ni’jste boekuutgiften van de stichting huus an huus te koop anbeuden. Zoe’n 75 vri’jwilligers zorgen d’r alle jaoren weer opni’j veur dat veul meensken ok op disse wieze in de kunde kommen mit de Stellingwarver streektael en streekkultuur. Behalven boeken ligt d’r in de sutelkrojen ok ere negosie, zoas cd’s, de Stellingwarver Spreukekelender en et Stellingwarver tiedschrift De Ovend. De sutelders bin ok woensdag 31 augustus en maendag 5 september in Stellingwarf-Oostaende. Ze kommen dan o.e. in Appelsche, De Fochtel, Else en Oosterwoolde. Vanof woensdag 7 september is de aktie in Westaende.

Kraompien in de grotere dörpem

Ni’j is dit jaor een vaast verkooppunt in de grotere dörpen daor suteld wodt. Dat punt is te herkennen an een opvalende vlagge; meensken kun ok bi’j dat verkooppunt Stellingwarver boeken kopen of bestellen. In september wo’n bestellings ommenocht thuus bezorgd.

Lutz Jacobi opni’j van de perti’j

Veurig jaor dee Twiede Kaemerlid Lutz Jacobi veur et eerst mit an de Stellingwarver sutelaktie. Dat voldee heur zo best dat ze alle sutelders nuugde om een daggien naor de Twiede Kaemer in Den Haag te kommen. Et wodde een prachtige dag, die bi’j iederiene ommeraek in de smaek vul. Omreden Jacobi veul belang hecht an et in levend gebruuk blieven van de kleinere taelen, dot ze ok dit jaor weer mit an de sutelaktie. Op maendag 29 augustus gaot ze de streek op mit oold SSR-veurzitter Ype Dijkstra.

Minisymposium 1517

10 augustus 2016 door Redaktie

In september 1500 verschient de Saksische legeranvoerder Von Schaumburg mit 1500 man bi’j Berkoop. Bi’j de slag die dan leverd wodt – misschien wel op de Delleboersterheide – komt d’r een aende an de Stellingwarver én Friese vri’jhied. Et hiele gebied vaalt dan onder et Duutse riek van keizer Maximiliaan.

De Stichting Stellingwarver Schrieversronte is van doel en orgeniseer in 2017 een minisymposium angaonde et biezundere jaor 1517. In dat jaor wodde et gebied Stellingwarf, dat vanof 1500 bi’j Frieslaand onderbrocht is, opdield in de twie grieteni’jen Stellingwarf-Oostaende en Stellingwarf-Westaende. Op et symposium zal d’r ommedaenken wezen veur verschillende onderwarpen die mit die gebeurtenis te maeken had hebben en naor de invloed d’r van. De daotum van et 1517-symposium is op dit mement nog niet bekend.

Foto Delleboersterheide: Ype Dijkstra

Kursus: We leveren je een streek

25 februari 20203 augustus 2016 door Redaktie

De kursus We leveren je een streek is veural bedoeld veur meensken die nog niet zovule weten over de streek waor ze wonen, mar die d’r wel graeg wat meer van weten willen zollen. Daoromme kommen in disse kursus verschillende onderwarpen in et kot an bod, zodaj’ mit al die mooie onderwarpen even in anraeking kommen. De kursus bestaot uut drie aovenden en een exkursie. Op elke kursusaovend, die twie uren duurt, kommen twie onderwarpen an bod. Die onderwarpen bin: de vroegste geschiedenis van Stellingwarf, de geschiedenis van et laandschop, de dörpen van Stellingwarf, de netuur van Stellingwarf, de Stellingwarver streektael en Stellingwarver literetuur. De exkursie is naor een Stellingwarfs netuurgebied mit as exkursieleider Freddie de Vries.

De kosten bin € 45,00 per persoon, koffie/thee inbegrepen.

De daotums van de kursus bin:

Deensdagaovend 4 oktober (van 19.30 tot 21.30 ure):

Algemiene geschiedenis, deur Geert Lantinga
De geschiedenis van et Stellingwarfs, deur dr. Henk Bloemhoff

Deensdagaovend 11 oktober (van 19.30 tot 21.30 ure):

De dörpen van Stellingwarf, deur Sietske Bloemhoff
Stellingwarver proza en poëzie, deur Peter Riksma

Deensdagaovend 18 oktober (van 19.30 tot 21.30 ure):

De geschiedenis van et laandschop, deur drs. Dennis Worst
De netuur van Stellingwarf, beeldreportage deur Ruurd Jelle van der Leij

Zaoterdagmorgen 29 oktober (van 9.00 tot 11.30 ure):

Exursie in een Stellingwarfs netuurgebied, o.l.v. Freddie de Vries

Bi’j interesse kuj’ et beste even bellen mit et kantoor van de Schrieversronte: 0516-451108, of mailen naor: info@stellingwarfs.nl.

(Foto: Sietske Bloemhoff)

Mooi anbod routegidsen tiedens Eupen Stal

3 augustus 2016 door Redaktie

Tiedens de keunstroute Eupen Stal in Berkoop is d’r bi’j de Schrieversronte een slim aorig anbod. T/m 21 augustus kuj’ daor drie prachtige Stellingwarver routegidsen kopen veur de pries van twieje. D’r is keuze uut zeuven fiets- of kuierroutes. Zoe’n mooi anbod laoj’ toch niet lopen??