Jong van hatte mit et Stellingwarfs de toekomst in
Een mooie Stellingwarver naeme zien we an De Monden bi’j Else. Et peerdepension van de femilie Bergsma hiet et Elserveld, en dat is de oolde veldnaeme van de omgeving daore. Et is vanzels arg mooi dat zokke oolde veldnaemen zichtber blieven! De foto’s wodden oons toestuurd deur Hendrik Betten van Else.
En hier is hi’j dan… Nommer 100 in de serie Stellingwarfs in et ‘wild’! Et Schoelepad in Zaandhuzen!
De foto’s wodden oons toestuurd deur Ype en Joke Dijkstra van Oosterwoolde. Et Schoelepad is et oolde pad dat van vroeger van Zaandhuzen naor De Oosterstreek leup. De kiender van Zaandhuzen gongen langs dat pad naor de schoele in Noordwoolde. Et Schoelepad komt ok over de Zaandhuzer Wetering, dat van hiel vroeger een oold ziedstroompien is van De Lende. Et lopt butendat deur et prachtige netuurgebied Et Zaandhuzerveld, dat in eigendom is van Staotsbosbeheer. Et gebied is mit naeme bekend deur de prachtige orchidenen die daor in juni in volle bluui staon.
Een meens moet d’r ok es even op uut…
Daoromme gongen Immy, Saskia, Trijnie en Sietske oflopen deensdag mit mekeer een daggien vot. Gong de passenielsreize veurig jaor niet veerder as de Koepelbos in Berkoop; dit keer gongen de vaaste mitwarkers van de Schrieversronte (liekewel zonder Rosa) hielemaole naor Dwingel. Naor de tunen van Harrie Boerhof om percies te wezen. En naor resteraant Wesseling veur een overheerlike ‘high tea’. Mar hoe nuum ie dat laeste now in geef Stellingwarfs? Wie et wet mag et zeggen…
Foto’s 2, 3 en 4: Saskia Douma; nr. 1 Sietske Bloemhoff
Now en dan wo’n oons berichten angaonde et gebruuk van twietaelighied toestuurd. Dit keer gebeurde dat deur Henk en Philomène Bloemhoff. Tiedens heur vekaansie in de Provence zaggen ze ok daor een mooi veurbeeld van twietaelighied angaonde plaknaemen. De naeme van dit plak wodt, behalven in et Fraans, ok angeven in de tael van de streek, en dat is et Provençaals.
Wie in de kommende vekaansieperiode ok zokke aorige veurbeelden van et gebruuk van twietaelighied zicht: we stellen et slim op pries as jim daor foto’s van maeken en oons die toesturen! Dat toesturen kan naor info@stellingwarfs.nl, t.a.v. Redaktie stellingplus.nl.
Twiede veurzitterJan Baas overhaandigde Ype Dijkstra et eerste exemplaor van de Stellingwarver Spreukekelender veur 2017. Op et schild van de kelender is een foto plaetst die Ype Dijkstra op de Delleboeren bi’j Berkoop maekte. (Foto: Lenus van der Broek)
Deensdagaovend 21 juni wodden de leden van de Stellingwarver Schrieversronte, die niet naor de jaorvergeerdering in meie kommen konnen, nog in de gelegenhied steld om heur vertrekkende veurzitter Ype Dijkstra de haand te drokken. Daornaost weren besturen van instellings en vertegenwoordigers van de overheden nuugd.
Twiede veurzitter Jan Baas kon een mooie groep meensken welkom hieten en vanzels in et biezunder de oold-veurzitter en de vrouw. Et wodde een slim genoeglike aovend mit veul goeie woorden veur Dijkstra, die op kundige wieze jaorenlaank et veurzitterschop uutvoerde. Woorden van lof weren d’r o.e. van Uultsje Hosper, de vroegere direkteur van It Fryske Gea, iene van de netuurinstellings daor de Schrieversronte al jaoren slim goeie kontakten mit het. Mar Hosper kende Dijkstra ok al vanuut de tied dat die nog burgemeester was van de gemiente Boarnsterhim, zodat d’r nog aorige verhaelen van doe naor veuren kwammen.
Koen Eekma
Saemenwarking mit Friese instituten
Hiel wies is de SSR mit et kedo dat anbeuden wodde Koen Eekma, de direkteur van de Friese taelinstelling Afûk. Eekma beud t.b.v. et hiemkunde-onderwies an om gratis gebruuk te maeken van een peer digitale taellessepakketten die deur de Afûk ontwikkeld binnen. Eekma vertelde dit veural ok te doen deur de altied goeie kontakten en saemenwarking van de beide taelinstellings onderling.
Et slotwoord van oold-veurzitter Ype Dijkstra
Tael en streekkultuur belangriek
An et aende van de aovend vertelde Ype Dijkstra op zien bekende enthousiaste wieze hoe hi’j al die jaoren geneuten het van zien bi’jdrege veur de Stellingwarver Schrieversronte. Hi’j het alle goeie kontakten mit de ere bestuursleden, de direkteur en alle (warkgroep)leden as een riekdom erveren. Dijkstra legde ok nog even de naodrok op hoe groot as hi’j et belang van de eigen tael en kultuur veur de meensken in de streek vindt. Daornaost nuumde hi’j ok et belang van alle saemenwarking mit ere instellings as Historische Verienings, netuursinstaansies én de Friese instituten, die d’r de laeste jaoren op gang kommen is of die meer uutbreided wodden kon.
De optredens van The Lion Rules vullen bi’j iederiene ommeraek goed in de smaek
De aovend wodde muzikaol opfleurd deur The Lion Rules, een Stellingwarfs/Fries duo dat bestaot uut Jeannette Roeles en Yska de Leeuw.
Foto’s: Lenus v.d. Broek