Jong van hatte mit et Stellingwarfs de toekomst in
Herdaenken
Dawwe niet vergeten
Dawwe zorgen
Dat wat gebeurd is
Nooit meer kommen gaot
Ommedaenken
Veur alle dooien
Mannen, vrouwen, kiender
Die et leven laoten hebben
Veur jow, veur mi’j, veur oons
Oonze vrede, oonze vri’jhied
Bedaenken
Dat willen we nooit meer
Mar et gebeurt hieltied weer
Dawwe vechten, moorden
Mit aandere waopens, aandere woorden
Gister, vandaege, morgen
Is d’r nog algedurig
Gien veilighied en verdreegzemhied.
…
Attie Nijboer, 2 meie 2016
Tiedens et Lendesymposium van een peer jaor leden weren veul schilderi’jen van De Lende die Annie Ligthart maekte te zien. Daornao was d’r een prachtige ”Lende-expesisie’ van heur in et gebouw van de Schrieversronte in Berkoop. (Foto: Lenus van der Broek)
Tot en mit donderdag 7 juli kan tiedens kantooruren van de Stellingwarver Schrieversronte de expesisie ‘Zwarven deur de Stellingwarven’ bezocht wodden. De schilderi’jen die te zien binnen, bin allemaole van Annie Ligthart van Oosterwoolde. Ligthart is veural bekend van heur schilderi’jen die ze maekte van de revier De Lende, mar ze schildert ok op ere plakken in de Stellingwarven. Zo is d’r prachtig wark van heur te zien dat ze in de Kaele Dunen maekte en van bi’jglieks de Schaopedobbe en et Fochtelervene. Inspiraosie vun Annie Ligthart ok in verschillende plakkies in West-Stellingwarf. Zo legde ze o.e. de Braandemeer in de Westhoek en et Iekenverlaot bi’j De Hoeve vaaste op et doek. De expesisie is van maendag tot en mit donderdag te bekieken tussen 9.00 en 16.00 ure in et gebouw van de Schrieversronte in Berkoop. De toegang is vergees.
Op exkursie mit Dennis Worst (links) en Emiel Beijk (in de midden) in de Koepelbos. Foto’s: Lenus van der Broek
Exkursie laandschopsgeschiedenis
Zaoterdagmorgen 30 april gongen kursisten van de kursus Laandschopsgeschiedenis in Der Izzerd en de beide Hooltwoolden op exkursie in en om de Koepelbos bi’j Berkoop. Tiedens de exkursie was d’r mit naeme bveul ommedaenken veur de variaosie an netuursoorten vanof et beekdal van De Lende richting de dekzaandrogge, de zonuumde opstrek. Der Izzerd, Ni’je- en Ooldehooltwoolde liggen zels op een soorte van overgangspunt: in et westen sluten de dörpen an op et veenweidegebied en in et oosten bin elementen te vienen van et dekzaandlaandschop. Omreden de drie dörpen zels gien groter netuurgebied hebben wodde besleuten om naor en veural aachter de Koepelbos te gaon; dat gebied vaalt et beste te vergelieken mit een opstrek zoas die in et oostelike diel van Der Izzerd veurkomt. De exkursie wodde holen o.l.v. Emiel Beijk van Staotsbosbeheer en drs. Dennis Worst. Eerdaegs wodt de kursus, die deur de Stellingwarver Schrieversronte orgeniseerd wodde, ofsleuten mit een fietsexkursie.
Andries van der Veen lat een jong kikkertien zien. (Eigen foto)
Ok dit jaor orgeniseert de Stellingwarver Schrieversronte weer netuurexkursies t.b.v. et vak Hiemkunde in et basisonderwies. Kotleden gong Freddie de Vries mit kiender van Hooltpae et veld in, oflopen weke weren leerlingen van basisschoele De Oostenbrink van Buil op exkursie. Daorveur gongen ze op ’e fiets de kaante van Doldersun uut en kuierden daor in de bossen o.l.v. exkursieleider Andries van der Veen van Wolvege. Van der Veen is riegelmaotig as exkursieleider de netuur in, zo verzorgt hi’j ok exkursies veur Staotsbosbeheer.
Exkursies mit kiender vint Van der Veen arg mooi om te doen. ‘Kiender hebben veul belangstelling veur de netuur en staon daor nog hielemaole eupen veur. Mit et verzorgen van disse exkursies hoop ik de kiender nog meer liefde, mar ok respekt, bi’j te brengen veur de prachtige netuur om oons henne. We wonen in een schitterend gebied, en in elk dörp is wel wat moois en biezunders zien te laoten en om over te vertellen,’ neffens Van der Veen.
In disse stamme bleek een nussien van een pimpelmeze te zitten. (Eigen foto)
De kiender van Buil geneuten ommeraek; zo keken ze niet alliend naor verschillende voegels en plaanten, mar bestudeerden bi’jglieks ok et leven in de stamme van een dooie birkenboom.
Andries van der Veen is iene van de leden van de speciaole warkgroep Netuurexkursies van de Stellingwarver Schrieversronte. De ere leden die mit groepen schoelekiender de netuur intrekken bin Hans Lanting (Der Izzerd), Harm Smid (Wolvege) en Freddie de Vries (Hooltpae). Veur et opstarten kunnen van et anbod kreeg de SSR indertied steun van o.e. et ministerie van Ekenomische Zaeken en Vogelbescherming Nederland.
Maendagaovend 18 april hul schriever Johan Veenstra zien 3000ste optreden. Dat optreden was op ‘e Lemmer veur de Vrouwen van Nu in dat plak. Veurzitter Ype Dijkstra fielseteerde him uut naeme van bestuur, passeniel en leden van de Stellingwarver Schrieversronte. (Foto’s: Lenus van der Broek)
De aldereerste keer dat Veenstra argens vertelde was in 1975. Et vertellen nam een grote vlocht doe hi’j mit zien Stellingwarver Stiekelstokkies wekeliks op Omroep Frieslaand te heuren was. Hi’j kon doe overal in Frieslaand kommen te vertellen. Behalven in de drie zudelike perveensies het Johan Veenstra veerder in alle perveensies verteld veur alderhaande groepen volk en et is him nog nooit overkommen dat ze et Stellingwarfs argens niet verstaon konnen. Ok niet in Den Haag doe hi’j daor vertellen moch veur de vutters van Aegon in et heufdkantoor daor. Veenstra: ‘ Ik hebbe et doe wel even inleided in et Nederlaans, want de meerste meensken hadden vanzels nog nooit van de Stellingwarven en et Stellingwarfs heurd. Mar et verstaon was gien inkeld perbleem. Et was een geweldige middag en ik hebbe daor wel twintig boeken verkocht. Aj’ mar dudelik praoten, dat is vanzels wel een veurweerde.’ Et is niet verwonderlik dat Veenstra de meerste keren in et Friese Frieslaand verteld het. Mit mekeer 1421 keer. Mar hi’j was vanzels ok vaeke in de Stellingwarven aktief. West-Stellingwarf: 453 keer, Oost-Stellingwarf 399 keer. In Drenthe moch hi’j 329 keer vertellen. Johan Veenstra is nog lange niet van plan en hool d’r mit op. Veenstra: ‘Ik vien et prachtig wark. Eins vule mooier as schrieven. Dat zolange as meensken me vraogen om te kommen, stap ik in de auto en gao ’k d’r op of.’
Omdat meensken een plezierige aovend of middag hebben willen bestaot et grootste pat van zien optredens uut humoristische verhaelen. Mar de laeste tied vertelt hi’j in zien pergramme ok over en uut zien ni’je suksesroman Een vrouw van ivoor die de laeste tied veur twie lireraire priezen nommeneerd wodde. Ien van die nommenaosies wodde verzulverd. Op 3 april kreeg hi’j in theater Winsinghhof in Roden de Streektaelpries 2015 van et Dagblad van het Noorden.
Al de jaoren deur het Veenstra in et schoft en nao ofloop van zien vertelaovens en -middaegen zien eigen boeken an de man brocht. Mit mekeer het hi’j op die meniere veur zien uutgever, de Stichting Stellingwarver Schrieversronte in Berkoop, veur een kleine € 200.000,- verkocht.
Overzicht
Frieslaand: 2273
West-Stellingwarf: 453
Oost-Stellingwarf: 399
Et Friese Frieslaand: 1421
Drenthe: 329
Overiessel: 188
Grunningen: 119
Flevolaand: 39
Gelderlaand: 28
Noord-Hollaand: 11
Utrecht: 8
Zuud-Hollaand: 4
België: 1