Foto’s: Lenus v.d. Broek
Mit een unieke exkursie in et Zaandhuzerveld wodde maendagaovend de kursus ’Stellingwarfs veur beginners’ ofsleuten. Exkursie- en kursusleider Geert Lantinga vertelde over de biezunderheden en geschiedenis van dit prachtige stokkien Stellingwarf. Zo was o.e. al et begin te zien van de bluui van de orchidenen, die eerdaegs mit mekeer et veld weer van een lilawitte kleur veurzien zullen. Ommedaenken was d’r ok veur de Wetering die an de zuudkaante van et Zaandhuzerveld te vienen is; vermoedelik is dat van hiel vroeger een ziedstroom van de revier De Lende. Veurdat de kuier in et Zaandhuzerveld begon wodde liekewel eerst nog even de Bekhofschaans bi’j Berkoop bezocht.
De kursus wodde dit jaor in de Hoolten Klinte in Appelsche holen. An et aende van de exkursie rikte kursusleider Henk Bloemhoff de kursisten een ‘Bewies van mitdoen’ uut. De kursusleiding beston dit keer behalven uut Geert Lantinga en henk Bloemhoff uut Mark van Veen.
Et doel is dat de kursus in november opni’j uut aende gaon zal, mar dan in de dörpen Oolde- en Ni’jlaemer.