Speciaole uutzendings ’In Twielochten’

In disse, veur veul meensken, smoeke vekaansieperiode zorgt et ni’je Stellingwarver radiopergramme ‘In Twielochten’ twie speciaole uutzendings. Zo wodt op 27 december et verhael ‘De kastaovend van de jeneverkeuning’ van Jouk, de schoelnaeme van Martinus Bakker (1926-1996), verteld deur Klaasje Herder van Oosterwoolde, wiels d’r veerder luusterd wodden kan naor biezundere (streek)meziek. In de uutzending van 3 jannewaori is d’r ommedaenken twie volksverhaelen van Wube Lamers van de Kuunderwal, en is d’r ok veur die keer een biezundere meziekkeuze maekt.

‘In Twielochten’ is elke vri’jdagaovend te beluusteren van zes tot zeuven ure op de lekaole omroep Odrie in Oost-Stellingwarf en op Radio Centraol in West-Stellingwarf. Et pergramme wodt herhaeld op ’e zundagmorgen van negen tot tien ure. ‘In Twielochten’ is trouwens ok via ’live-stream’ op ’e beide websteden van de omroepen te volgen.

Et radiopergramme is een perduktie van de Stellingwarver Schrieversronte en wodt ombeurten prissenteerd deur Sietske Bloemhoff en Kjest Herder; laestnuumde zorgt ok veur de techniek.          

Smoek Stellingwarfs Meziekfestival

Smoek, gezellig en kwalitatief een goed meziekfestival, dat was waor de dielnemers en bezukers op weerommekieken kunnen angaonde et Stellingwarfs Meziekfestival. Dat wodde zaoterdagaovend veur de veertiende keer holen, en veur de twiede keer was dat in de Rustende Jaeger van Hooltpae. Zat die zael veurig jaor liekewel stampvol bezukers, dat was spietig genoeg now niet et geval. Dat zal te maeken had hebben mit o.e. de voetbalwedstried Nederlaand-Noord-Ierlaand, zo wodde docht. De aovend wodde op kundige wieze prissenteerd deur warkgroeplid Klaasje Herder, wiels de warkgroepleden Piet Tjassing en Kjest Herder veur et geluud zorgden.

Et Veenpoolderkoor uut Scharpenzeel o.l.v. Madelon Kok van Ni’jhooltpae brocht een mooi ofwisselend pergramme mit o.e. lieties uut de bekende Stellingwarf Cantate. Et twiede optreden wodde ofsleuten mit et zingen van et Stellingwarfs Volkslied dat deur alle bezukers staonde mitzongen wodde.

Ni’je lieties van Carolien Hunneman   

Speciaol uut Finlaand was overkommen Carolien Hunneman die zorgd hadde veur een tal ni’je lieties, en die bi’j iederiene ommeraek in de smaek vullen. Mit naeme was dat et lietien ‘Taelemannegien’, et lietien over heur vierjaorige zeuntien dat niet alliend in et Fins en Nederlaans opvoeded wodt, mar toegeliekrtied ok hiel wat Engels mitkrigt en daor niet de minste muuite mit het, integendiel. Hoe goed et leven Carolien in Finlaand bevaalt bleek uut et fraaie lietien ‘Naor huus’. 

Teksten van Harmen Houtman

Lammy Bruyns brocht, heurzels begeleidende op ’e moenieke, veul lieties mit teksten van Harmen Houtman, waor ok een flink tal ni’jen bi’j weren. Ok Lammy zorgde veur een mooie ofwisseling in heur riegel lieties, en leut an et aende nog even een echte Fraanse musette heuren. Lammy wun indertied talloze wedstrieden mit heur akkordeonspel, zi’j volgde dan ok heur opleiding op een konservatorium. 

A capella: Emma Winter

Vlak veur et schoft zong Emma Winter van Wolvege op speciaol verzuuk a capella et lied ‘Stellingië’, dat is et filmlied van de film ‘Daor klept de klokke weer’. Ok veur heur bi’jdrege was veul wardering.

Lekaole omroepen

Tiedens de aovend maekte Kjest Herder opnaemen veur et ni’je radiopergramme ‘In Twielochten’ dat elke vri’jdag van 18.00 tot 19.00 ure uutzunnen wodt op ’e lekaole omroepen Odrie en Weststellingwerf Centraol. Dat daoromme kan iederiene die disse mooie aovend miste een tal van de lieties weeromme heuren in dat pergramme.

Et Stellingwarfs Meziekfestival is een aktiviteit van de Stellingwarver Schrieversronte: veur de kommende keer wodt vanwegens et 15-jaorige jubileum veur een ere, biezundere opzet keuzen. De warkgroep komt in december al weer bi’j mekeer om mit de veurbereidings daorveur uut aende te gaon

Fins tiedens Stellingwarfs Meziekfestival

Zaoterdagaovend 16 november wodt veur de twiede keer et Stellingwarfs Meziekfestival holen in de Rustende Jaeger in Hooltpae. De opzet van et festival zal dit jaor wat eers wezen as de veurgaonde keren. In plak van zes dielnemers bin et d’r dit keer viere, zodat d’r veur iederiene wat meer tied en ruumte is om van him of heur heuren te laoten. Et doel is om vanof volgend jaor et festival te verbrieden, dat hoolt in dat d’r dan ok dichters en schrievers an et festival mitdoen gaon.

Speciaol uut Finlaand: Carolien Hunneman   

Dit keer doen an et festival mit Et Veenpoolderkoor van Scharpenzeel (o.l.v. Madelon Kok uut Ni’jhooltpae), Lammy Bruyns (Et Vene/Vinkege) en Carolien Hunneman (Finlaand/Oosterwoolde).

Et Veenpoolderkoor zal veural lieties naor veuren brengen uut de ommeraek bekende Stellingwarf Cantate; naor dat optreden kieken now al veul meensken uut. Lammy Bruyns zal veural ni’je lieties heuren laoten mit teksten van Harmen Houtman; ze begeleidt heurzels op de moenieke. Ok Carolien Hunneman het een tal ni’je lieties in et Stellingwarfs, mar ze zal grif ok een peer Finse heuren laoten. Sund al weer hiel wat jaoren woont Carolien, die van oorsprong van Oosterwoolde komt, in de Finse heufdstad Helsinki. Carolien begeleidt heurzels op ’e gitaar; heur Stellingwarver teksten bin veur et grootste pat schreven deur heur heit Wim.

A capella: Emma Winter

Vlak veur et schoft zal Emma Winter van Wolvege et lied ‘Stellingië’ a capella zingen. Dat is et filmlied van de film ‘Daor klept de klokke weer’, en ok in die film wodt dit prachtige lied zongen deur Emma.

Et festival begint om 20.00 ure en zal zo tegen 11.00 ure oflopen wezen. De toegang is vergees, mar een kleine financiële gift wodt deur de orgeniserende Stellingwarver Schrieversronte slim op pries steld.

Wark Dick Bakker en klokkestoelen trekt veul volk

Et is zo drok as wat in Berkoop (foto’s Lenus v.d. Broek)

Veul interesse bliekt d’r  tiedens de Eupen Stalperiode te wezen veur de twie tentoonstellings die bi’j de Stellingwarver Schrieversronte te bezuken binnen. Dat gelt in de eerste plak veur de prachtige eulievarfschilderi’jen van Dick Bakker van Ooldetriene. Op zien schilderi’jen wet Bakker de indrokwekkende netuur van de Braandemeer en de Rottige Miente in West-Stellingwarf op een kundige wieze zien te laoten. Hi’j lat de biezundere gebieden op een eigen, mar veural ok hiel herkenbere, wieze volledig tot heur recht kommen.  

Miniaturen Stellingwarver klokkestoelen

Ok veul interesse en wardering is d’r ok veur de miniaturen van twaelf Stellingwarver klokkestoelen. Die miniaturen wodden indertied deur Aaldert Alten van Noordwoolde maekt t.b.v. et vak Hiemkunde in et basisonderwies. Eerder warkte Alten mit as infermaant veur et vaktaele-onderzuuk van de Stellingwarver Schrieversronte. Hi’j vertelde mitwarker Sietske Bloemhoff over de bouw van de klokkestoel om zo alle begrippen die mit de bouw te maeken hebben te verdudeliken. Behalven dat die woorden allemaole opneumen binnen in et Stellingwarfs Woordenboek verschenen ze ok in een boek over de Stellingwarver klokkestoelen dat in 1988 uutgeven wodde.

‘Luudklokken en klokkestoelen in Stellingwarf

Intied is et krek nuumde boek al weer herwerstjaoren uutverkocht. Daoromme verschient eerdaegs een hiel ni’j boek, mit daorin niet alliend et – verni’jde – verhael over de Stellingwarver klokkestoelen, mar ok dat van de luudklokken in de regio. Daorveur zorgt Jan Koops van Oosterwoolde, die de laeste peer jaor daor uutgebreid onderzuuk naor dee en hiel veul gegevens ontdekte die an now toe niet bekend weren. Van et ni’je boek, dat veurzien wodt van veul oolde en ni’je foto’s, is begin september de prissentaosie.     

‘Het kanaal’ filmt De Verdwenen Peerden

Naodat op 3 en 4 augustus 2018 de prachtige theatertocht ‘De Verdwenen Peerden’ opvoerd wodde, zoj’ daenken dat de beide peerden now echt vot wezen zollen… Mar niks is minder waor, want bi’j dit Schrieversronteprojekt heurt ok de verfilming van dit oolde verhael uut Ni’jberkoop. Daorveur zorgt et artistieke kollektief ’Het Kanaal’ uut Grunningen, mit o.e. Patrick Hoving, die ofkomstig is van Basse, een klein plakkien vlakbi’j Steggerde. ‘Het Kanaal’ bestaot uut jonge meensken die krek ofstudeerden an et konservatorium, heur opleiding volgden op Minerva, of nog studeren an de Popakedemie in Liwwadden. De groep, die wisselend van grootte is, timmert beheurlik an de weg. Zo koj’ ze eerder dit jaor ok mit (muzikaole) theaterveurstellings tegenkommen op bekende festivals as Oerol en Noorderpop.

   Veur et verfilmen van De Verdwenen Peerden was ‘Het Kanaal’ begin juli in Ni’jberkoop om heur impressie en beleving van et verhael in filmbeelden omme te zetten. Iene van de heufdrollespeulders is Andries van der Veen uut Wolvege, die liekewel as oold-inwoner van Ni’jberkoop et dörp op zien doempien kent. ‘Het Kanaal’ legt graeg verbanen tussen vroeger en now, tussen oold en jong; en uteraord heurt daor ok et Stellingwarfs bi’j. In de haast zal de film o.e. in Berkoop vertoond wodden. Wanneer dat wezen zal, is op dit mement nog niet nog bekend.

   In de film is o.e. een scene te zien rond een beeld dat een blievende herinnering wezen zal an et verhael van de beide peerden. Et wodde maekt deur Janneke Hoek, krek as Hoving juust ofstudeerd an Minerva. Et beeld staot in de bos van Boshoeve, vlakbi’j de ingang an de Grindweg. Behalven op dat plak wodde d’r  filmd in et Diakenievene, op ’e Delleboersterheide en bi’j de klokkestoel van Ni’jberkoop.