Jong en oold geneut van film DKDKW


Op ‘e foto’s: 1. De jongste speulders 2. Ok de wethoolders Jouke Jongsma en Marcel Bos van Oostaende geneuten van de film; rechts Thomas Rovers 3. Anne (Emma Winter) en Franke (Lute Wedekind) 4. Auke Stelling (Dirk Nijk) sprekt et volk toe (Foto’s 1 en 2: Sietske Bloemhoff, foto’s 3 en 4: Lenus v.d. Broek)

Een volle theaterzael van ’t Buurthuus in Noordwoolde; dat leverde de eerste vertoning van de Stellingwarver film ’Daor klept de klokke weer’ in Stellingwarf op. Jong en oold kwam op disse biezundere aovend of, en iederiene die mitdaon hadde of die uut belangstelling kommen was, bleek nao ofloop slim onder de indrok te wezen van de kwaliteit van de film daor speulders, figuraanten en skriptschriever-regisseur Thomas Rovers en zien opnaemeploeg mit mekeer veur zorgd hadden. De aovend was liekewel al veur de vertoning fleurig uut aende gaon in de smoeke foyer van ’t Buurthuus. Dat kwam niet in et laeste plak deur et hoge reüniegehalte, mar zeker ok deur de middelieuwse sfeer daor et duo Marianta (Marita Kruijswijk en Marian Nesse) muzikaol veur zorgde.

Onderwies

Schrieversronteveurzitter Klaas van Weperen gaf in zien eupeningswoord et belang van dit soorte van projekten an veur et Stellingwarfs. Hi’j gaf ok an dat d’r de laeste tied hiel arg veul positief ommedaenken en belangstelling is veur et Stellingwarfs, veural ok veur et Stellingwarfs binnen et onderwies. Ok de film ‘Daor klept de klokke weer’ is mit naeme bedoeld veur et (vervolg)onderwies. An lesmateriaol en speciaole warkwinkels heurende bi’j de film wodt de kommende tied warkt, zodat de prissentaosie van de film an de schoelen laeter dit jaor wezen zal.

Roerige geschiedenisperiode

Tiedens et dri’jen van de film koj’ in de zael een spelde valen heuren, zo stille was et. Jong en oold geneut bi’j et zien van et filmverhael over een roerige periode in de Stellingwarver geschiedenis. Et gaot om de tied rond 1500 doe Stellingwarf zien vri’jhied, nao veul striederi’je, veurgoed kwietraeken zol en bi’j Frieslaand indield wodde. De film is baseerd op et boek ‘Daar klept de klok weer’ dat onderwiezer Hendrik Hoogeveen in 1949 schreef, en dat vuuftig jaor laeter deur Hans Koopmans, ok onderwiezer, in et Stellingwarfs vertaeld wodde.

Mit mekeer

An et aende van de aovend bedaankte Schrieversrontedirekteur Sietske Bloemhoff iederiene die him op wat veur meniere dan ok inzet hadde veur de film van hatte daorveur. ‘Et was een meraokels mooie tied die we mit mekeer hadden. En mit mekeer hebben we zorgen kund veur disse prachtige film. In de tied dat ik bi’j de Schrieversronte wark is dit misschien wel de aldermooiste aktiviteit veur mi’j west an now toe,’ zo leut ze weten. Bloemhoff benaodrokte ok de geweldig grote inzet van de heufdrollespeulders Emma Winter, Lute Wedekind, Dirk Nijk en Evert Pultrum, en die van Thomas Rovers en eerste regie-assistent Marco Reekers. Emma Winter kreeg extra ploempies uutdield, want zi’j zingt in de film ok nog es et prachtige ‘Lied van Stellingië’ (tekst Henk Bloemhoff, meziek Robert Lanting). Tot slot fielseteerde Klaas van Weperen Sietske Bloemhoff omreden ze disse maond 35 jaor in dienst is bi’j de Stellingwarver Schrieversronte. 

Film naor de dörpen

De kommende tied zal de film in een flink tal dörpen in Stellingwarf vertoond wodden. Bi’j die vertonings zullen mitwarkers en/of speulders an en in de film uutleg geven over hoe de film tot staand kommen is, mar ze zullen grif ok over heur eigen, soms smeuiige, erverings tiedens de opnaemedaegen vertellen.

Et roegelt komplementen veur ni’je film!

V.l.n.r: Marco Reekers, Dyno Hedges, Thomas Rovers, Sietske Bloemhoff, Evert Pultrum, Dirk Nijk en Emma Winter.  Foto: Lenus v.d. Broek)

Geweldig veul lof en komplementen weren d’r donderdagaovend veur de maekers en speulders van de ni’je Stellingwarver film ‘Daor klept de klokke weer’. Veur de première d’r van was ommeraek veul belangstelling, zodat Filmhuus Slieker in Liwwadden ok heur twiede filmzael beschikber stellen mos. De aovend wodde orgeniseerd deur et Europees buro veur kleine taelen (EBLT) i.s.m. de Stellingwarver Schrieversronte op ’e ’Dag van de Memmetael’.

Veul speulders en figuraanten van de film weren naor Liwwadden kommen om daor veur et eerst ’heur’ film te zien. De spanning was vanzels groot, op dit mement hadden ze allemaole even waachten moeten. De opnaemen wodden in de zommer van 2017 maekt, mar deur wat tegenslag nao die tied was de film laeter klaor as dat eerst et doel was.  

Skriptschriever en regie

Spanning was d’r vanzels ok bi’j skriptschriever en regisseur Thomas Rovers uut Grunningen. Ok al was hi’j tot op et laeste betrokken bi’j de laeste punties op de i; veur him was et uteraord slim spannend hoe op zien eerste grote film reageerd wodden zol. Spanning was d’r ok bi’j zien regie-assistent Marco Reeker, filmmeziekmaeker Dyno Hedges en Sietske Bloemhoff die indertied et initiatief veur de film nam en veur de perduktie zorgde. Al gauw was dudelik dat d’r niet alliend veul lof en wardering was veur alle akteurs in de film, niet minder was die d’r veur Rovers en zien filmploeg. In alle opzichten professioneel, dat was wat kenners d’r van zeden, en daor was ieder vanzels slim mit inneumen.

Filmlied Stellingië

Arg veul wardering was d’r ok veur et filmlied ‘Stellingië’, dat an et aende van de film te heuren is. Heufdrollespeulder Emma Winter zingt et lied op indrokwekkende wieze; de tekst wodde schreven deur Henk Bloemhoff, de meziek is van Robert Lanting. Et doel is om et lied ok nog appat van de film uut te geven.

Ni’je plannen      

Van verschillende kaanten wodde d’r donderdagaovend vraogd of d’r bi’j de Stellingwarver Schrieversronte ni’je filmplannen binnen. Thomas Rovers en Sietske Bloemhoff hebben weten laoten dat die d’r inderdaod binnen. Et gaot liekewel dan om fiktie: et doel is dat een tal oorspronkelike Stellingwarver volksverhaelen verfilmd wodden zullen, mar dan daelezet in de tied van now. ‘Mar die plannen bin nog in een beginfase,’ neffens Rovers en Bloemhoff. ‘We bin eerst nog even drok mit disse film van vanaovend. D’r bin al verschillende anvraogen, ok al vanuut Drenthe, veur et vertonen van ‘Daor klept de klokke weer’. De eerste keer dat de film weer dri’jd wodden zal is op 22 meert, dat wodt mitien een soort van reünie veur alle meensken die op wat veur meniere oons hulpen hebben bi’j et maeken van de film.’