STELLINGWARFPOP KOMT DE HIELTIED DICHTERBI’J!

Stellingwarfpop komt de hieltied dichterbi’j!

Zaoterdagaovend 29 september wodt in Berkoop veur de vuufde keer et popfestival Stellingwarfpop holen. Dit keer is zorgd veur een fantastisch ofwisselend pergramme. Et festival is op et evenementeterrein De Doevekaampe en begint om 19.00 ure. Om mit te doen an Stellingwarfpop moe’n de dielnemers op zien minst ien eigen Stellingwarfstaelig nommer naor veuren brengen. Veul groepen zullen liekewel meerdere nommers in et Stellingwarfs heuren laoten. Opvalend is dat d’r dit keer meer semi-akoestische optredens binnen as eerder. De orgenisaosie is daor bliede mit, want die perbeert om veur zoe’n groot meugelike verscheidenhied an meziek te zorgen. Dat dat now bi’j et eerste lustrum – et gaot dit keer om et vuufde Stellingwarfpop – et geval is, is daoromme een mooie vere op de hoed.

Stellingwarfpop wodt prissenteerd deur Fons Herder, rondomtoe bekend as zanger van de fermaosie A Liquid Landscape. Et festival duurt tot 24.00 ure en is gratis. De volgende bands/duo’s/singer-songwriters doen mit:

The After Midlife Group

Disse band bestaot uut Guus Huis in ‘t Veld (zang, gitaar), Teo Krijgsman (zang, gitaar), Tonny Hassing (bas) en Jan Visser (drums, zang). Et rippertoire van The After Midlife Group is hiel verschillend, mar de groep speult veural bekende popmeziek vanof de jaoren ’60.  

Rosie Kills

Rosie Kills bestaot uut zangeres Sietske Sietsma en gitarist Rob Zandgrond. Beide bin al jaoren aktief in de meziek en vaeks ok in dezelde bands, zoas o.e. in heur eigen rockband Carmentheband mit eigen nommers. Uut die groep is ok et duo Angelsmile ontstaon, dat nommers van eerdernuumde band akoestisch speult. Nao een onderbreking van een jaor of drie, waorin Sietske en Rob heur eigen muzikaole paeden insleugen, bin ze now beide weer aktief in de rockfermaosie Rosie Kills, en laoten as duo op Stellingwarfpop nommers van die band akoestisch heuren.

COR & co

COR & co is een gelegenhiedsfermaosie die speciaol veur Stellingwarfpop in et leven reupen is. Sommige leden speulden eerder in Roadhawks, die eerder ok mitdee an Stellingwarfpop. Aandere leden bin aktief in de band Twadde Leafde. Over de tekst ‘En op mien boek zit een muske’ vertelt Peter Hassing, tekstschriever en iene van de leden van de band, dat et lied over stress en warkdrok gaot, mar ok over ontspanning. Peter vun ooit een muske, et besien was halfdood. Et knapte liekewel op en bleef drie jaor in de buurt van Peter en zorgde zo veur ontspanning in een drok bestaon.

Freaking Doodle Special

Freaking Doodle Special is een band die uut jonge meensken bestaot en die rockmeziek maekt. De band bestaot uut Suzanne Kuilberg (zang), Mark Bijlsma (gitaar), Rik Friso (bassist) en Yorick Herszkowicz (drums). Rik en Yorick deden eerder ok mit an Stellingwarfpop, mar dan in een aandere band. Et rippertoire van Freaking Doodle Special bestaot veural uut rockmeziek.  

Serge Epskamp

Serge Epskamp is een singer-songwriter die van oorsprong uut de Aachterhoek komt, mar onderhaand al weer een kleine tien jaor in Zaandhuzen woont. Tegere mit bluegrass-specialist Erwin van de Ven zorgde Serge veur de cd ‘Oer’, die op 22 september verscheen. De meziek die Serge en Erwin brengen is een mix van americana, bluegrass, pop en verstilde akoestische nommers. In tegenstelling tot eerdere berichten treedt Serge op Stellingwarfpop niet alliend op, mar tegere mit Erwin.

Spirit of the dark

De hardrockband Spirit of the dark bestaot sund 2011. De groep speult veural covers die in een eigen jassien steuken wodden, van The Animals tot Deep Purple, mar ok van Iron Maiden en Saxon waor de veurkeur naor uutgaot. Spirit of the dark het ondertussen drie eigen Stellingwarver nommers. De band bestaot uut Jannie Dijkstra (zang), Martin Vogels (gitaar), Eise Dijkstra (bas) en Remko de Jong (drums). 

The Jetfarm

The Jetfarm bestaot uut Ruud Fieten (zang, gitaar) en Rob Zandgrond (zang, gitaar). Et duo bestaot now ongeveer twie jaor, mar ondanks dat nog mar kotte bestaon treedt The Jetfarm al mit veul bekende bands en singer-songwriters op, op grote festivals, tuunfeesten en kaemerkonserten. Zo dee et duo dit jaor nog mit an de Grote Prijs van Nederland. De meziek van The Jetfarm is een mix van jazzy funk en americana, country en blues.

Stellingwarfpop 2012

Op zaoterdag 29 september zal veur de vuufde keer et Stellingwarfs popfestival Stellingwarfpop holen wodden. Dit keer is et festival in Berkoop op de Doevekaampe. Stellingwarfpop begint aovens om zeuven ure en duurt tot middernaacht. De prissentaosie is krek as de veurige twie keer in hanen van Coen Speelman. Coen is behalven meziekkenner ok drummer van de an de weg timmerende band A liquid landscape.

Om an Stellingwarfpop mitdoen te kunnen moet an een peer veurweerden voldaon woddden. Zo moet in elk optreden op zien minst ien Stellingwarfstaelig nommer naor veuren brocht wodden. Dat nommer moet oorspronkelik wezen, dat gelt niet alliend veur de tekst mar ok veur de meziek. Een deskundige jury zal uutmaeken wie veur et beste/origineelste/mooiste en ni’jste Stellingwarver lied zorgde. Veur de winner wodt een mooie geldpries beschikber steld.  

An Stellingwarfpop kun zeuven bands, singer/songwriters, rappers en zo mitdoen. Op dit mement hebben heur al twie acts opgeven. Anmellen kan tot 1 september. Bands die graeg mitdoen willen kun heur anmellen bi’j de Stellingwarver Schrieversronte in Berkoop. Dat kan deur even te bellen naor 0516-451108, mailen kan ok , naor info@stellingwarfs.nl. (Laeter meer…)

Taelkundige dr. Henk Bloemhoff onderscheiden

(Foto Lenus van der Broek)

An et aende van de jubileumbi’jienkomst vanwegens et 40-jaorig bestaon van de Stellingwarver Schrieversronte wodde Henk Bloemhoff van Oosterwoolde benuumd tot Ridder in de Odder van Oranje Nassau. De onderscheiding kreeg Bloemhoff opspeld deur burgemeester Harry Oosterman van Stellingwarf-Oostaende vanwegens zien grote inzet veur et Stellingwarfs en de Stellingwarver Schrieversronte deur de jaoren henne. Zie en luuster ok naor:

Omroep Frieslaand: http://bit.ly/HiXE7d

Liwwadder kraante: http://www.lc.nl/friesland/regio/article14777973.ece/Taalkundige-Henk-Bloemhoff-geridderd