Kot nao ni’jjaorsdag zag Hans Salverda van Zorgvlied disse mooie Stellingwarver naeme van een straote in Doldersum. Op ‘e aachtergrond is nog krek zoe’n betien de beek Vledder Ao te zien. Now zoj’ daenken dat de naeme Neijaorsweg wat mit ni’jjaor te maeken het, mar dat is toch niet zo. Et woord ‘jaor’ betekent in dit geval zoks as ‘gaard’ en wodt hier bi’jomme wel bruukt om een wat kleiner kaampien laand vlakbi’j een boerderi’je mit an te duden, vergeliekber mit et wat bekendere ‘goorn’. Et woord zels kuj’ vergelieken mit et Engelse ‘yard’ veur ’tuun’ of ‘hof”.
Meensken, die ok es een aorige Stellingwarver naeme in et eupenbaor zien, kun een foto daorvan opsturen naor info@stellingwarfs.nl.