306. De Ribbe

De Ribbe is een straotnaeme in Scharpenzeel. Een toepasselike naeme in et waeter- en rietlaand van de Westhoeke van West-Stellingwarf. Een ribbe is een smalle stroke grond tussen twie patten van een venepoele. (Foto en tekst: Johan Veenstra)

305. De Kragge

De Kragge is een straotnaeme in Scharpenzeel. Krek as De Ribbe ligt de straote in een ni’jbouwwiekien, vlakbi’j de karke. Een kragge is een moerassig stok laand vlakbi’j een venepoele mit meerst riet d’r op. (Foto en tekst: Johan Veenstra)

304. ’t Butent

Henk Jager van De Blesse zag de naeme ’t Butent op een straotnaemebottien in Ooldemark. Et weggien mit die aorige naeme lopt langs et ‘Veerhuis’ naor buten de dörp.

303. Op ’t Oost

Een lunchroom op et oost van Wolvege het de toepasselike naeme Op ’t Oost. Een mooie tegenhanger is een appattementekompleks op et west van Wolvege. Dat het de naeme Et West (nommer 65 in disse serie). (Foto’s en tekst: Johan Veenstra)