Tael buten deure

Kotleden wodde deur Marcel Bos, hi’j is wethoolder van de gemiente Oostaende, in Else een speciaol bod onthuld. Dat bod is vlakbi’j et schoeleplein plaetst en geft an dat kiender, die deur de oolden mit de auto brocht wodden, daor nog evenpies een tuut kriegen kunnen, veurdat  ze et plein op gaon. De auto’s moe’n now i.v.m. corona op zonuumde ‘Tuut en d’r uut’ plakken parkeren. (Foto en tekst: Hendrik Betten)

Lange niet iederiene kent et mooie netuurgebied rond De Catspoele in Ni’jberkoop. Et ligt oostelik van et Diakenievene en wodt krek as dat gebied ok beheerd deur It Fryske Gea. Ok hier het de bekende netuurinstaansie de oolde naeme van de poele in staand holen: De Catspoele. Eerder woonde vlakbi’j bi’j die poele de femilie Cats lange tied. Et huus staot liekewel krek over de dörpsgreens mit Berkoop.

Tiedens et dörpsfeest van 2019 het et dörp Ni’jhooltpae him uutleefd. De bewoners van de Vriesburgerweg hadden andacht veur et boerebedrief. Aenlik hadde d’r koekalveri’je staon moeten. Mar och… De koe is mooi en et kalf van zoe’n koe wodt grif lieke mooi! (Foto en tekst: Johan Veenstra)

Kotleden wodde et pergramme ‘Simmer yn Fryslân’ deur Omroep Frieslaand uutzunnen vanuut Makkinge. Wat veul kiekers veural opvul was dat in et pergramme de hiele prissentaosie in et Fries was. Dat niet iederiene dat wardeerd het, bliekt wel uut een stikkerplakaktie in et van oorsprong zo Stellingwarver dörp. Onder de Friese stikker van Omroep Frieslaand is een ere, Stellingwarfstaelige, stikker te zien, mit as tekst: ‘Stellingwarfs, as ’t even kan!’.

Disse winkel mit de mooie Stellingwarver naeme ‘Huus Zeuven’ staot an de Van Harenstraote in Wolvege. Henk Jager maekte d’r een foto van en stuurde die de redaktie van de rebriek Stellingwarfs in ‘t wild toe.