De 68e jaordag van schriever Harmen Houtman zal hi’j grif niet gauw vergeten! Datzelde gelt ok veur alle meensken die vri’jdagmiddag 22 feberwaori die jaordag mitvieren konnen. Want naodat iederiene mit mekeer veur de jaorige zongen hadde, verscheen in et MFC ‘De ni’je stienze’ van Ni’jhooltpae ok et ni’jste boek van Houtman ‘As ik kiezen moch…’. Et eerste exemplaor rikte de schriever uut an Ype Dijkstra uut Oosterwoolde. Dat gebeurde mit naeme omdat Houtman altied veul bewondering en respekt had hadde veur de wieze waorop Dijkstra negen jaor veurzitter was van de Stellingwarver Schrieversronte.
Ontroerend
Ype
Dijkstra gaf an dat hi’j slim wies was mit et boek, en gong vervolgens in op de
verhaelen die in ‘As ik kiezen moch…’ opneumen binnen. Dat kon, omreden hi’j van
teveuren deur de uutgeveri’je van de Schrieversronte in de gelegenhied steld
was et boek te lezen. ‘Et is veural een hiel ontroerend boek wodden,’ zo gaf
Dijkstra o.e. an. ‘Jow hebben daor niet alliend op een hiele mooie en gevulige
wieze in verteld over jow jaoren thuus bi’j jow oolden in Ni’jhooltpae, mar bi’jglieks
ok over de biezundere reizen die jow tegere mit jow vrund maekten.’ De
oold-veurzitter van de SSR gaf daorbi’j een peer veurbeelden van de verhaelen
uut mit naeme et eerste pat van et boek.
Links: Schrieversronteveurzitter Klaas van Weperen, rechts: Johan Veenstra en Harmen HoutmanO
Lied ‘As ik kiezen moch…’
De
middag was om drie ure eupend deur de Schrieversronte-veurzitter van now, Klaas
van Weperen. Van Weperen gaf an dat et een drokke weke west hadde bi’j zien
klub, ommes de aovend d’r veur was de première van de film ‘Daor klept de
klokke weer’. Ok Van Weperen hadde et boek al even lezen kund, en ok hi’j was
onder de indrok van de inhoold van et boek.
Harmen
Houtman kwam netuurlik zels ok an et woord. Hi’j vertelde over hoe hi’j, naodat
hi’j een periode aenlik alliend mar gedichten en liedteksten schreven hadde, de
draod van et schrieven van verhaelen weer opnam in 2011. Veur et schoft las
Houtman et verhael ‘De laeste jurk’ uut et ni’je boek veur. Veur et schoft trad
ok Lammy Bruyns op en zong een tal lieties mit teksten van Houtman, heurzels
begeleidende op de akkordeon. Speciaol veur de middag was et verhael ‘As ik
kiezen moch…’ deur Houtman ok in dichtvorm schreven, en Lammy Bruyns brocht dit
lied op een ingetogen en gevulige wieze.
Speciaol verhael van Johan Veenstra
Nao
et schoft weren d’r twie biezundere bi’jdregen. Zo vertelde kollega-schriever
Johan Veenstra een speciaol schreven verhael veur disse middag over veul
gebeurtenissen die hi’j tegere mit Houtman mitmaekt hadde. En dat weren d’r
hiel wat, want Veenstra en Houtman bin al meer as vuuftig jaor goeie
kammeraoden. De bezukers an de middag kwammen zo aorig wat an de weet van de
soms hilarische tafrielen die heur indertied ofspeuld hebben… Disse prachtige
bi’jdrege Johan Veenstra is nog te lezen op zien webstee.
Attie Nijboer
mit gedichten
Nao
et verhael van Johan Veenstra las Attie Nijboer een keuze uut de gedichten van
Harmen Houtman veur. De dichteres uut Oosterwoolde vertelde ok dat ok zi’j veul
wardering het veur et wark van Houtman, en dat was ok wel te marken an heur
kundige wieze van veurdracht. Now en dan treden Nijboer en Houtman ok tegere
op, zoas oflopen zommer in de Taeletuun in Liwwadden.
Noardewyn
Nao
et schoft zong zangeres en akkordeoniste Lammy Bruyns opni’j een tal van heur
prachtige lieties mit teksten van Harmen Houtman. Houtman en Bruyns treden ok
nogal es tegere op, zoas dat eerdaegs et geval wezen zal in et Friese
meziekpergramme ’Noardewyn’ op Omroep Frieslaand. Dat zal wezen op vri’jdagmiddag
8 meert; et livepergramme is van 13.00 tot 16.00 ure en is te volgen op ’e tillevisie,
radio en internet.
Et
was goed half zesse doe de Schrieversronte-veurzitter een mooie kulturele
middag, daor zoe’n 90 meensken op ofkommen weren, ofsluten kon. ‘Dit soorte van
middagen bin van groot belang,’ zo gaf Van Weperen an. ‘Ik hoop dan ok dat de
Stellingwarver Schrieversronte nog in lengte van daegen deurgaon kan mit et
orgeniseren van goeie aktiviteiten veur de toekomst van de Stellingwarver tael
en kultuur.’
Foto’s: Lenus v.d.Broek
