Redaktie
Luusterders genieten van veurleesaktie
Op donderdag 7 en vri’jdag 8 feberwaori was d’r in de jaorlikse veurleesweke weer een grote groep van vri’jwilligers van de Stellingwarver Schrieversronte op pad om de bewoners van verpleeghuzen en zorginstellings een mooie veurleesmorgen of –middag te bezorgen. Ieder jaor hoolt de SSR disse aktie in de eerste helte van feberwaori; dit keer was de koördinaosie d’r van in hanen van Kiena Bouwer van De Haule. Van tal van Stellingwarver schrievers wo’n d’r verhaelen veurlezen, vaeks gaot et om humoristische verhaelen en verhaelen over vroeger tieden. De verhaelen slaon altied meraokels an, en vaeke geft een verhael weer anleiding om mit mekeer herinnerings op te haelen. Dat de aktie slim wardeerd wodt, bliekt wel uut de verhaelen daor de veurlezers mit weerommekommen. Ieder jaor kommen d’r butendat weer ni’je groepen bi’j waor an veurlezen wodt. Zo las Baukje Krediet veur et eerst veur in de Vinckenhoeve in Vinkege en Hendrik Betten an een oolderengroep in et MFA van Berkoop. Omreden de aktie alle jaoren groter wodt is d’r aenlik nog wel verlet van meer veurlezers. Wie mithelpen wil an disse mooie aktie kan him opgeven op et kantoor van de Schrieversronte, dat kan tillefonisch naor 0516-451108 (even vraogen naor Kiena Bouwer) of per mail naor info@stellingwarfs.nl.
Foto’s: Lenus v.d. Broek
187. De Wolterswiek
De Wolterswiek is de naeme van een huus an de Dwasvaortweg op ‘e Oosterstreek. (Foto’s en tekst: Johan Veenstra)
186. Koe-kiek krukkien
Argens in de buurt bi’j de Blesdiekegerheide kuj’ mooi even op dit krukkien bekommen en geniet intied van et uutzicht op ‘e koenen. ‘Al lopen d’r op et mement schaopen,’ zo gaf Annie Dedden an doe ze oons disse foto toestuurde!
Fleurig aende kursus Stellingwarfs
Op de foto, veuran, v.l.n.r.: kursisten Miranda van der Vegt, Elizabeth Bergsma, Marian Jansen, Afra Wamsteker; boverste riegel v.l.n.r. kursusleider Mark van Veen; kursisten Jan Mulder, Wesley Veen, Johan Jansen, Roelof Bakker, Albert Slagter; SSR-bestuurslid (siktaoris) Hendrik Fokkema en kursusleider Henk Bloemhoff. Kursist Bertus v.d. Akker was verhinderd. (Foto: Lenus v.d. Broek)
Mit een alderfleurigste bi’jienkomst wodde donderdagaovend 24 jannewaori de jongste kursus Stellingwarfs ofsleuten. Dat gebeurde in et vaaste lesplak van dit seizoen, de Eupenbaore Biebeltheek van Wolvege. De ‘kursus Stellingwarfs I’ hul disse keer zes lesaovenden van twie lesuren in. De lessen wodden verzorgd deur de kursusleiders Mark van Veen (Wolvege) en Henk Bloemhoff (Oosterwoolde).
Et gaot d’r in dit soorte van beginnerskursus omme et Stellingwarfs beter onder de kni’je te kriegen. De naodrok kwam disse keer stark op et schrieven van et Stellingwarfs te liggen, ok omreden haost alle kursisten van huus uut Stellingwarfs praoten en et lezen mar hiel zelden een perbleem is. Liekewel kreeg dat onderdiel ok et neudige ommedaenken, omreden luudop lezen helpt bi’j et goed uutspreken en omdat veul lezen helpt bi’j et vaasteholen van et goeie woordbeeld. En daor hej’ netuurlik baot bi’j aj’ et Stellingwarfs schrieven.
In de lessen is an de haand van een powerpoint veul ommedaenken geven an spelling, uutspraoke, woordgebruuk en grammatika, et laeste veural veur wat de oddering van de warkwoorden betreft. Een biezunder ommedaenken kreeg hoe aj’ et ien en aander in hulpmiddels opzuken kunnen (haandwoordeboek, boek ‘Schrijf je ’t Stellingwerfs’, ‘Taal in Stad en Land: Stellingwerfs’ en digiveurzienings op stellingia.nl en stellingplus.nl). D’r is warkt mit opzuukoefenings, invullen van muuilike vormen in zinnen en veerder mit diktees.
Meer praoten, meer schrieven, et Stellingwarfs zichtberder maeken in opschriften – ok dat weren onderwarpen die ommedaenken kregen. Disse kursisten hadden meerst uut heurzels al belangstelling veur Stellingwarver verhaelen, gedichten en romans, of bin die belangstelling now dudelik an et ontwikkelen. Ok historische boeken, al of niet in et Stellingwarfs, hadden ze aorighied an. De geschiedenis kreeg in disse kursus mit naeme ommedaenken in de vorm van et ontwikkelen van een eigen Kanon van Stellingwarf. Op dat punt zal nog warkt wodden an een vervolg. Et zal de kursusleiding ok bepaold niet verbaozen as de oold-kursisten dommiet gauwachtig es een verhael of gedicht publiceren in bi’jglieks et tiedschrift De Ovend. De kwaliteiten daorveur lieken d’r te wezen.
In april is d’r nog een soorte van ofslutende exkursie naor een netuurgebied in Stellingwarf, zoks onder leiding van netuurkenner Freddie de Vries van Hooltpae. Dan kriegen de kursisten ok heur ‘Bewies van mitdoen’ an disse kursus.
Ofslutend op disse laeste aovend voerde Schrieversronte-bestuurslid Hendrik Fokkema nog even et woord. Hi’j sprak zien wardering veur de belangstelling van de kursisten uut en nuumde nog even dat de Stellingwarver Schrieversronte meer in huus het dat veur heur de muuite weerd wezen kan. In dat verbaand wees hi’j d’r ok op dat et beeld dat vroeger wel beston: ‘een klein lekaol gebeuren’ al lange niet meer klopt. Et tael- en kultuurinstituut Stellingwarver Schrieversronte het leden en ondergaot belangstelling niet allienig in de regio Stellingwarf en omgeving, mar ok van veer daorbuten. Levend bewies is iene van disse kursisten. Zi’j bezocht de bi’jienkomsten in Wolvege van Amsterdam uut.