An de Oosteregge in Ni’jberkoop hebben de bewoners van iene van de huzen indertied een aorige Stellingwarver naeme vunnen. Dat het alles te maeken mit et feit dat ze slim inneumen weren mit et plakkien. en bliede weren dat ze dat Vunnen hadden.
Redaktie
88. Bennies Kraom
Bi’j Bennies Kraom in Blesdieke kuj’ niet alliend voegelhokkies kopen, mar ok knarries. De foto veur de rebriek Stellingwarfs in et ‘wild’ wodde instuurd deur Annie Dedden.
87. De Koele
De Koele: een viadukt bi’j Hooltpae kreeg disse toepasselike Stellingwarver naeme. De foto’s wodden veur Stellingwarfs in et ‘wild’ instuurd deur Freddie de Vries uut dat dörp. We kwammen de naeme ‘Koele’ ok al eerder tegen in disse serie, mar dan as naeme op et vekaansiepark De Hildenberg in Appelsche (nr. 68).
Johan Veenstra weer nommeneerd
Johan Veenstra vertelt uut ‘Een vrouw van ivoor’ – zien 25e boek – tiedens de prissentaosie daorvan. (Foto: Lenus v.d. Broek)
De Stellingwarver schriever Johan Veenstra het veur zien laeste roman Een vrouw van ivoor veur de twiede keer een nommenaosie kregen. Een schoffien leden wodde Veenstra mit vier Friestaelige schrievers nommeneerd veur de Rink van der Veldepriis. Now is de schriever uut Ni’jhooltpae nommeneerd veur de Streektaelpries van et Dagblad van het Noorden. Veenstra is op ’e kotlieste/shortlist terechtekommen mit de Drentse schrievers Gerard Nijenhuis, Klaas Koops, Tieme Woldman en de Grunninger schriever Jan Siebo Uffen. Butendat is een biezundere edisie van et Drentse literaire tiedschrift Roet nommeneerd. Johan Veenstra kreeg de Streektaelpries van et Dagblad van het Noorden 2009 veur zien roman Et geheim van de wiend. In et Dagblad van het Noorden wodt Een vrouw van ivoor ongewoon eupenhattig in de streektaelliteretuur nuumd. Op zundag 3 april wodt in de Winsinghhof in Roden bekendmaekt wie de Streektaelpries 2015 krigt.
De roman Een vrouw van ivoor verscheen 21 augustus veurig jaor bi’j de Stellingwarver Schrieversronte in Berkoop en telt 176 bladzieden. De roman kreeg geweldig goeie receensies in de Liwwadder Kraante en et Dagblad van het Noorden.
Ok in 2014 en 2015 weren d’r nommenaosies veur boekuutgiften van de Stellingwarver Schrieversronte. In 2014 was dat veur et kienderboek Winterwille en in 2015 veur et boek Van schossel tot slingerpad mit wark van drie Stellingwarver dichters en drie beeldend keunsteners.
Sprokies van Grimm in et Stellingwarfs
In de naozommer van 2016 verschient d’r een Stellingwarver verzaemeling van de wereldberoemde sprokies van de gebroeders Grimm: Sprokies van Grimm in et Stellingwarfs. Et gaot om een ni’j diel in een serie van de Grimmsprokies in kleine taelen. Eerder verschenen al een Friese vertaeling (2012) en een Bildtse (2015), en op 19 meert 2016 kommen ze mit een Grunninger vertaeling veur ’t locht.
Veur de Stellingwarver vertaeling zorgen Sietske en Henk Bloemhoff, bekend van de Stellingwarver Schrieversronte; de uutgever is Taalburo Popkema. In et boek zullen ongeveer twintig sprokies opneumen wodden, mit kleurrieke illestraosies van Peter Boersma&Hilda Groenesteyn (zie ofbelinge).
Et is veur et eerst dat d’r zoe’n omvangrieke verzaemeling Grimmsprokies in et Stellingwarfs verschient. Et boek is bedoeld veur iederiene, mar ’t is vanzels ok biezunder aorig om uut veur te lezen an jonge kiender.