Een meertaelige uutgifte van een oold sprokien
In de meertmaond is d’r in et noorden van Nederlaand vaeks extra ommedaenken veur et gebruuk van (streek)taelen. D’r bin gemienteraoden die in de streektael vergeerderen en d’r bin karkediensten in de eigen tael. Et sprokien Verkã, Wolf en de zeuven geities is een ni’jmoodse wieze om et gebruuk en de schoonhied van (streek)tael te belochten.
Gerard Stout, schriever uut et Drentse Peize, herschreef sprokies van de gebroeders Grimm over de Wolf en de zeuven geities en over Roodkappien en de wolf. Hi’j vun acht vertaelers veur zien sprokien. In een haandzem boek staon vertaelings in et Engels, Fraans, Duuts, Stellingwarfs, Westerkertiers (een Grunninger streektael), Plattduuts, Zuudoost-Drents en Riestendrèents, de variaant van et Nedersaksisch rond de greensrevier de Reest. (Greens tussen Drente en Overiessel.)
Verkã, Wolf en de zeuven geities begint in Duutslaand en hoolt op bi’j Zuud-Barge an et Oranjekenaol. De Duutse variaant van Maria Ufkes-Kayatz stopt bi’j Hamburg. De moraal van et sprokien blift beholen: gao niet mit vremden mit, mar wees ok niet bange veur et aeventuur. Tussen de riegels deur staon verwiezings naor de spannings in Europa van vandaege-de-dag. De identiteit van Verkã (wolf in et Perzisch) en de eigenhied van Wolf kommen naor veuren. Verkã en de Wolf ontdekken romantiek en erotiek.
In et boek staot een Nederlaanse versie mit een toelochting in voetnoten. Beginnende (sprokies)lezers kun zo makkelik de weg vienen.
Bijna alle vertaelings bin op YouTube te beluusteren, veurzien van netuurbeelden uit Noord-Nederlaand. Ok de Stellingwarver vertaeling is op YouTube te volgen, kiek daorveur op www.gerardstout.nl/wolf.
De vertaelers bin Carl-Heinz Dirks (Plattduuts uut Ostfrieslaand), Ivor Osgerby Bishop (Engels), Martin Koster (Riestendrèents), Madeleine Meursault-Proust (Frans), Sjoukje Oosterloo (Stellingwarfs), Gerard Stout (Zuudoost-Drents), Tonko Ufkes (Westerkertiers) en Maria Ufkes-Kayatz (Duuts), die ok veur illestraosies zorgde.
Verkã, Wolf en de zeuven geities is te koop bi’j de Stellingwarver Schrieversronte, telt 100 bladzieden en kost € 7,50.
