Serge Epskamp winner Stellingwarfpop!

Serge Epskamp winner Stellingwarfpop!

Serge Epskamp wun Stellingwarfpop mit et prachtige, deur himzels schreven lied ‘Laeste volle maone’. Links van him gitaar- en mandolinespeuler Erwin van de Ven en rechts die zien zeuntien Daniël. (Foto: Lenus van der Broek)

Zaoterdagaovend 29 september wodde veur de vuufde keer Stellingwarfpop holen. In et eerste ure van de zundag wodden deur jurylid Klaas Ozinga van Makkinge de winners van et festival bekend maekt. De eerste pries was veur Serge Epskamp en Erwin van de Ven. Die pries wunnen ze mit et prachtige lied Laeste volle maone, mit tekst en meziek van Serge. De twiede pries was veur Sietske Sietsma en Rob Zandgrond, die tegere et duo Rosey Kills vormen. De dadde pries wodde wunnen deur The After Midlife Group.

Et festival wodde op kundige wieze prissenteerd deur Fons Herder. (Foto: Lenus van der Broek)

Stellingwarfpop: een smoek en gezellig festival. (Foto: Lenus van der Broek)

Over et festival kuj’ meer lezen deur even te klikken op: Serge Epskamp wint Stellingwarfpop 2012

Veul ni’j eigentieds lesmateriaol prissenteerd

Tiedens de jaorlikse hiemkundemiddag veur de leerkrachten van et basisonderwies in de beide Stellingwarver gemienten wodde veul ni’j en eigentieds lesmateriaol veur mit naeme et Stellingwarfs binnen et vak Hiemkunde  prissenteerd. Opvalend was de grote verscheidenhied en de gruui van de hieltied meer digitale produkten. Ok de speciaole hiemkundewebstee www.stellingwerf-heemkunde.nl is de laeste tied geweldig uutbreid en bödt talloze digitale verwarkingsmeugelikheden veur de basisschoelen. Zoe’n dattig leerkrachten kwammen op de inspirerende middag of. (Laeter meer…) 

De foto’s bin maekt deur Lenus van der Broek

Gezellige boekemark bi’j Bruna in Oosterwoolde

Zaoterdag 15 september orgeniseerde de Stellingwarver Schrieversronte tegere mit boekwinkel Bruna in Oosterwoolde een boekemark van twiedehaans boeken. Veur de mark weren honderden boeken inbrocht, naodat daor naor vraogd was in o.e. et Stellingwarfs tiedschrift De Ovend en de regionaole kraanten. De veurbereidende kemmissie was over de inbreng van al die boeken arg tevreden, mar kan ok weerommkieken op een eerste goeie en gezellige boekemark. Verscheiden meensken kwammen speciaol naor Bruna toe, en vunnen in de veurraod ien of meer boeken van heur keuze. De mark wodde holen om mit de opbrengst d’r van (tegen de € 300,-) een diel van de jubileumaktiviteiten van de Schrieversronte financieel mit meugelik te maeken.

Op zaoterdag 27 oktober is d’r nog zoe’n boekemark, mar dan in Wolvege bi’j The Readshop (Zwikstra). Ok die mark is van 11.00 ure tot 16.00 ure.

De kemmissie die de marken veurbereidet bestaot uut Fettje Alten (Noordwoolde), Jantje Boer (Oosterwoolde), Geert van der Meulen (Oosterwoolde) en Albertha Zwaagstra (Oosterwoolde). Beide foto’s bin maekt deur Coen Adams van boekwinkel Bruna.

SUTELAKTIE ROEM BOVEN € 16.000,-!

Sutelaktie roem boven € 16.000,-!

Ok dit jaor kan de Stellingwarver Schrieversronte weerommezien op een hiele goeie sutelaktie. Tiedens de zes aovens dat d’r suteld wodde is veur roem € 16.000,- an boeken, kelinders, cd’s en kaorten verkocht. Topper in de verkoop was et ni’je boek De dörpen van Stellingwarf in oolde beelden van Jan Koops en Jan de Vries, mit plaknaemeverklaorings van Henk Bloemhoff. Intied het de Stellingwarver Schrieversronte een herdrok van et boek besteld. Ok arg goed verkochten de Stellingwarver Spreukekelinder 2013 en et boek Mit et waeter veur de dokter van Johan Veenstra. Krek as veurig jaor was d’r ok now weer flink belangstelling veur de Stellingwarver kienderboeken. Daornaost vul op dat flink wat meensken belangstelling toonden veur et Stellingwarver Voegelboek dat laeter dit jaor verschient. Datzelde gelt ok veur et boek mit verzaemeld wark van H.J. Bergveld, dat van de haast uutgeven wodden zal. 

Op de slotaovend van de sutelaktie 2012 was de stemming onder de sutelders slim goed en wodde mit mekeer op de laeste verkoopciefers waacht. Die wodden zo tegen de klokke van tienen bekendmaekt deur Joop Donker van Wolvege, ien van de vri’jwilligers die alle keren kontrole hul over de opbrengsten. Nao de prachtige uutslag daankte Schrieversronte-direkteur Sietske Bloemhoff alle vri’jwilligers (roem 80) die heur ok dit jaor veur de aktie inzet hebben, en moch Jan Punter – hi’j zorgt d’r alle jaoren veur dat de sutelkrojen op et goeie plak kommen en dat ze rulende blieven – mit de speciaole suteltoeter de sutelaktie 2012 uutblaozen.