Jong van hatte mit et Stellingwarfs de toekomst in
Veur zoveer bekend hangt in Munnikeburen de eerste Stellingwarver wimpel in top. Die wimpel wappert an de ni’je vlaggemast in de tuun veur et huus van Siebolt Hofstra. Hofstra gong op zuke naor een wimpel die ofleided is van de officiële vlagge van West-Stellingwarf. Die bleek d’r niet te wezen, en vervolgens ontwurp zeune Feike d’r zels een prachtigen iene. Et maeken van de wimpel gebeurde bi’j de Dokkumer Vlaggecentraole. (Foto’s: Lenus van der Broek)
In de Eupen Stal-periode bin de kantoortieden van de Stellingwarver Schrieversronte anpast. Et kantoor is in die weken los van morgens elf tot middags zes ure (van maendag t/m donderdag). Eupen Stal, waorvan twie prachtige expesisies in de grote zael van et SSR-gebouw te zien binnen, is van 13 juli t/m 11 augustus.
De jaorlikse boekekraante van de Stellingwarver Schrieversronte is ondertussen drokklaor en wodt ok dit jaor weer huus-an-huus verspreided deur PostNL. Die verspreiding zal gebeuren in weke 33, zoe’n aanderhalve weke veurdat, ok de jaorlikse, sutelaktie begint (op maendag 26 augustus).
‘Twie pond ’n stuver’ staot opni’j boordevol ni’js over de ni’jste boeken die de Stellingwarver Schrieversronte sund de veurige sutelaktie uutgeven het. Daornaost is d’r andacht veur de twie spiksplinterni’je routegidsen die vlak veur de sutelaktie prissenteerd wodden zullen. Butendat d’r is flink ommedaenken veur twie boeken die dit jaor nog verschienen zullen: dat bin de autobiografische roman ‘Et het genoeg west’ van Lies Boersma en ‘Winterwille’, een boek veur kiender in de basisschoeleleeftied.
In ‘Twie pond ’n stuver’ is veerder o.e. een uutgebreide bestelbon te vienen en bin aorige akties angeven. Meensken die de adverteensiepuzel foutloos insturen kommen in anmarking veur een mooi pakket mit Stellingwarver boeken.
‘Twie pond ’n stuver’ wodt alle jaoren financieel meugelik maekt deur een grote groep adverteerders, waorvan de meersten al mitdoen vanof de aldereerste boekekraante (roem 30 jaor leden)!
Ni’j initiatief Stellingwarver Schrieversronte
Prieswinners fotowedstried veur leerlingen basisschoelen bekendmaekt
Woensdagmiddag 19 juni bin in Berkoop de zes priezen uutrikt an de winners van de fotowedstried veur leerlingen van de Stellingwarver basisschoelen. De fotowedstried is een ni’j initiatief van de Stellingwarver Schrieversronte die om de twie jaor holen wodden zal. Bi’j disse eerste keer wodden de leerlingen vraogd om een foto te maeken van een plak in heur dörp dat in heur ogen hiel belangriek is. Hiel wat schoelekiender deden an de wedstried mit, toch hoopt de Schrieversronte dat d’r de volgende keer nog meer leerlingen mitdoen zullen!
De jury beston uut de onderhaand laandelik bekende fotografen Marije Kuiper en Ruurd Jelle van der Leij. Beide fotografen bleken vol lof te wezen over de kwaliteit van hiel veul inzunnen wark, en hebben butendat ommeraek veul wardering veur dit ni’je Schrieversronte-initiatief.
De winnende foto’s zullen alle zesse publiceerd wodden in et augustusnommer van et Stellingwarfs tiedschrift De Ovend.
Op ‘e foto vuuf van de zes winners, v.l.n.r.: Dana Jonker uut Oosterwoolde (1e pries groep 3 en 4), Irene Groen (Ni’jberkoop, 2e pries groep 3 en 4), Nienke Groen (Ni’jberkoop, 1e pries groep 5 en 6), Jeroen Boonstra (Makkinge, eerste pries groep 7 en 8) en Suzanne Wols (Ooldelaemer, 2e pries groep 7 en 8). Op de foto mist Jessica Tietema uut Sunnege (2e pries groep 5 en 6). Foto: Lenus van der Broek.
Bi’j Hotel Resteraant Lunia in Berkoop is een prachtige tentoonstelling inricht mit fotowark van Ruurd Jelle van der Leij. Bi’jkotten wodt die tentoonstelling nog veerder uutbreided deur in de mooie tuun van Lunia biezundere fotopanelen te plaetsen. We raoden jim van hatte an om de zo mooie foto’s van Ruurd Jelle bi’j Lunia te bekieken. En wie graeg een foto van Ruurd Jelle hebben willen zol, dat kan, want ze bin ok te koop! Lunia is alle daegen los.