Kotleden stuurde Annie Dedden van Blesdieke oons disse foto toe veur de rebriek Stellingwarfs in et ‘wild’. Ze maekte de foto in Langedieke waor ze de Stellingwarver naeme ‘Oons Dörpshuus’ op… et dörpshuus van dat plak staon zag!
Tael buten deure
26. De Stobbepoele
In Tronde, bi’j Else, staot de ‘Varkens-Zorgboerderij’ mit de Stellingwarver naeme De Stobbepoele. Vlakbi’j de boerderi’je ligt in een mooi netuurlik laandschop een poele mit dezelde naeme. Die Stobbepoele wodt al sund jaor en dag winters bruukt as iesbaene van Else. De foto wodde instuurd deur Annie Dedden van Blesdieke.
25. Et Speultuuntien
Ok in Scharpenzeel in de Westhoek van West-Stellingwarf ziej’ Stellingwarfs in ’t wild. Schrieversrontemitwarkster Immy Sloot maekte de foto van de naeme van de speultuun in heur dörp.
24. De Meuleveldweg
Van Fettje Alten van Noordwoolde kregen we disse foto van de Meuleveldweg. De foto is neumen op et plak daor de Meuleveldweg uutkomt in de buurtschop Riesberkaampen bi’j Buil.
23. De knienebergen
Veur de rebriek Stellingwarfs in et wild kregen we van Annie Dedden van Blesdieke disse beide foto’s. Et huus mit de naeme ‘De knienebergen’ staot in De Blesse. Et zol wezen kunnen dat et hier om een oolde veldnaeme gaot, die angeft dat et een wat heuvelachtige omgeving is daor een boel knienen veurkwammen. Op meer plakken komt de naeme as veldnaeme veur, zo ok in Berkoop, mar dan as ‘De knienebarg’.