Op ‘e Haule hej’ de Fenneweg. Now zollen we dat in et Stellingwarfs gewoon mit een ‘V’ schrieven, mar op oolde kaorten ziej’ wel es ‘Fenne’ staon as. Mit et woord ‘venne’ of ‘fenne’ wodt liekewel etzelde bedoeld as mit et Nederlaanse woord ‘ven’.
Tael buten deure
498. A’k mij now umkeer
In Drenthe ziej’ nogal es vuilkonteners mit een mooie stikker d’r op. Zo ok in Zorgvlied, en Hans Salverda maekte d’r een foto van. De tael van Zorgvlied vaalt onder et Stellingwarfs, et zol zomar zo wezen kunnen dat ze daor dan ok vaeker ‘ommekeer’ zeggen…
497. An de flesse
Mit de buuslaampe an maekte Henk Jager disse foto an de Spoorlaene in zien woonplak De Blesse. Veerdere uutleg liekt niet neudig…
496. Gewoon butengewoon
In Steggerde vieren ze ieder jaor et karneval ok. En ieder jaor staon daor ok weer bodden mit teksten in et Stellingwarfs om van et feest weten te laoten. Gewoon butengewoon, toch? Hans Salverda maekte de foto.
495. Stienwiekerweg
Henk Jager van De Blesse zag bi’j et ni’je keunstwark an de Stienwiekerweg (de oolde Rieksweg) dit drietaelige bottien.