Tael buten deure

Et parkeerterreintien bi’j dörpshuus de skulpe in Blaankenham het een hiele toepasselike naeme: et Kiek achter de diek plein. Mooie speuls, en mitien zo dudelik as wat. (Foto en gegevens: Henk Jager)

Kotleden zag Henk Jager in Blankenham vanof de zeediek de naeme ‘de skulpe’ staon. ‘Een mooie naeme. ‘Wi’j zeggen dat ja krek zo, al schrieven wi’j schulpe,’ vertelt Henk. ‘Et bliekt om et dörpshuus te gaon. Et is hier ok een toepasselike naeme, want et gebouw staot krek buten de zeediek.’ 

Hans Salverda van Zorgvlied zag disse Stellingwarver straotnaeme in Vledder. De foto maekte hi’j bi’j een verspringend kruuspunt an de oostkaante tegen de es an.

Delle is de naeme van een straote in Berkoop. Et woord ‘delle’ betekent een leegte in et laand, die meerstal op een netuurlike wieze ontstaon is. Mar soms kan et ok gaon om et restaant van een oolde sloot. Et kan wezen dat et woord hier eertieds bruukt is as naeme veur een leger legen stok laand, en dan gaot et om een oolde veldnaeme die op disse wieze mooi zichtber blift. (Foto en tekst: Sietske Bloemhoff)

In Zorgvlied holen ze op zundag 27 de eerste ‘midwinterhoornwandeling’, zo kuj’ lezen op posters die rondomtoe te zien binnen. Tiedens de kuier laoten verschillende midwinterhoornblaozers uut Else, Waoteren en Zorvlied van heur heuren, want zoas op de poster staot: Deze eerste zondag van de advent ‘goat we anbloaz’n‘; de tijd van het midwinterhoornblazen is weer aangebroken. Et midwinterhoornblaozen kwam van oorsprong veural in de oostelike perveensies veur en in et angreenzende Duutslaand. Van Stellingwarf is niet bekend dat et hier een tredisie west het. Wel kennen sommige plakken et woord ‘midwinterhoornblaozen’ of ‘midwinterblaozen’ (De Hoeve). De foto wodde opstuurd deur Hans Salverda uut Zorgvlied.