De Riete is een ziedstroompien van De Lende op ‘e greens van Oost- en West-Stellingwarf tussen Else en Buil. Op oolde kaorten wodt De Riete wel angeven as (Vollen) Rijte. De weg die et stroompien kruust is naor et bekien nuumd.
Tael buten deure
418. Woldplein
Zo ongeveer in et centrum van Stienwiekerwoold ligt een plein dat de naeme Woldplein kregen het. Now schrieven we in et Stellingwarfs ‘woold’ mar de bedoeling is vanzels hiel goed west in 1997! Foto en gegevens: Henk Jager.
417. ’t Hokkien
’t Hokkien is de naeme van et gebouwgien dat bi’j de iesbaene van Berkoop staot. Henk Jager van De Blesse zag et en stuurde d’r een foto van. De naeme zaggen we twie keer eerder in disse rebriek, zoas bi’j nr. 14 waor een foto te zien is van et dörpshuus van De Hoeve dat kot daorveur eupend wodde. Bi’j nr. 279 is een foto te zien van een infermaosiebod mit gegevens over ’t Fiene Hokkien, een hoolten karkien dat indertied staon het in de buurtschop Twietel bi’j Ni’jberkoop.
416. Mienbeken
Mienbeken is de naeme van een onverhadde weg die min of meer bi’j een bekien langes gaot. De weg ligt in Stienwiekerwoold en komt in zudelike richting uut op De Beek(weg). Dat misschien dat Mienbeken de Stellingwarver naeme veur de nuumde beek is. Et woord (b)liekt in ieder geval nargens aanders veur te kommen. (Foto’s en tekst: Henk Jager)
415. Diepe Wiede
Op et bod mit et fietskneuppunt Paasloregel staot ok Diepe Wiede angeven en dat ligt bi’j Wetering in de Weerribben. (Foto en gegevens: Henk Jager)