Tael buten deure

Kotleden wodde in Else een bottien plaetst mit de mooie naeme Ni’je Brink. Zoks gaot vanzels in Else niet zomar, want et bod mos neffes oold gebruuk ok deupt wodden mit Lendewater. De brink is te vienen op ‘e hoeke van de Heufdweg en de Frankenaweg. Een brink is van ooldsher bedoeld as plak waor meensken gezaemelik mit mekere dingen ondernemen of gewoon evenpies bi’jpraoten. D’r staon daoromme ok noflike baanken bi’j et keunstwark ‘Door en voor’ dat eerder plaetst wodde as wardering veur alle vri’jwilligers in Else; en die bin d’r in dat smoeke dörpien hiel veul! (Foto en gegevens: Hendrik Betten)

In Stienwiek kuj’ bi’j Electro World Oosterhof een biezundere stofzoeger kopen: ’t Steenwieker Stofzoegertien. Te gebruken in bedrieven en thuus, zo wodt angeven. Wat een aorige aktie! En daor heurt nog meer bi’j, want aj’m kopen kriej’ d’r een jaorabonnement bi’j van et tiedschrift ‘Old Steenwiek’ van de Historische Verieninge van Stienwiek, dat vier keer in et jaor uutkomt. (Foto en gegevens: Henk Jager)

De Stobbepoelweg is een aandere straote mit een Stellingwarver naeme in de buurtschop Bovenveld bi’j Donkerbroek. Van ere straotenaemen bin de naemen op ‘e bodden spietig genoeg in et Nederlaans, zoas bi’jglieks ‘Schapedrift’ en ‘Hanestreek’. Deur tal van bewoners zal liekewel nog altied Schaopedrift en Haenestreek zegd wodden. Stobbepoelweg hadde aenlik ok Stobbepoeleweg wezen moeten… (Foto en tekst: Sietske Bloemhoff)

In Donkerbroek hej’ nog altied de levendige buurtschop Bovenveld daor een peer straoten Stellingwarver naemen hebben, zoas Ruskeweg. En eers as dat wel es docht wodt is die Donkerbroekemer buurtschop, die an iene kaante greenst an de Duurswooldiger heide, zo Stellingwarfs as wat. ‘Daorginderd begint Frieslaand, daor praoten ze Fries,’ vertelde een bewoner me doe ik disse foto maekte, ‘hier is et Stellingwarf!’ (Foto en tekst: Sietske Bloemhoff)