Tael buten deure

294. Spinnerskaampe

door
Disse foto maekte Henk Jager gister doe hi’j in de buurt van zien woonplak De Blesse een fietstochien maekte. Et laandgoed Spinnerskaampe ligt an de Spinnerslaene in et plakkien Paosloo in de gemiente Stienwiekerlaand.

293. Klaozinge

door
De buurtschop Klaozinge an de Rijweg tussen Oosterwoolde en De Fochtel ligt acht meter boven N.A.P. en is daormit de hoogste van alle buurtschoppen die om Oosterwoolde henne liggen. De naemen van twie boerderi’jen bin Groot- en Klein Klaozinge. De laeste wodde eertieds ok wel Sickenga nuumd. Eerder laggen ze meer in et veld an et vroegere Karkepad (van De Fochtel naor Oosterwoolde), laeter bin ze verplaetst naor de Lykweg, die now al weer sund jaor en dag de Rijweg hiet.
(Tekst en foto’s: Sietske Bloemhoff)

292. De Kaamp

door
An de noordkaante van de buurtschop Klaozinge bi’j Oosterwoolde liggen de Noorder Kaampen. De heide die daor lag wodde vaeks anduded mit Hiddekaamp. In 1856 kocht Hidde Wietzes de Jong uut Suameer de plaets Klein Klaozinge. Et verhael wil dat hi’j daor niet zo goed boerkte en dat de plaets daoromme weer te koop kwam. De zaeke wodde verkocht, mar hi’j hul zels een stok heide en daor zette hi’j een husien op. Hidde had een grote huusholing, en zien naozaten bouwden daor zels ok weer husies. Zo is daor deur de tied henne een buurtschoppien ontstaon, dat de Hiddekaamp of kotweg De Kaamp nuumd wodde.
(Diel van de tekst op et bod, foto: Sietske Bloemhoff)

291. d’ Olde Tuunderije

door
d’ Olde Tuunderije is de Stellingwarver naeme van een tuunbedrief an de Keuningin Wilhelminalaene in Willemsoord.
Op iene van zien fietstochies in die mooie streek zag Henk Jager van De Blesse dit bod en maekte d’r een foto van. Zoas we et vaeker tegenkommen in disse serie is ok hier et woord ‘olde’ bruukt in plak van ‘oolde’.

290. ’t Boskefé Kobus

door
Bi’j camping Zonnekamp in Zorgvlied heurt Boskefé Kobus. Ik ston daor jaorenlaank in de grote zael mit mien boeken op ’e hobbymark op Twiede Pinksterdag. Spietig dat corona de laeste twie jaor roet in et eten gooid het. Over de hiele gevel van et kefé staot een tekst in et Stellingwarfs. ’t Boskefé Kobus… een biezunder plakkien    Bliede daj’ d’r binnen! Veur een happien en een draankien  Die tekst was niet in iene foto weer te geven. (Foto’s en tekst: Johan Veenstra)