274. In de leegte

Van Freddie de Vries van Hooltpae kregen we disse beide foto’s veur de rebriek Stellingwarfs in et ‘wild’. De boerderi’je mit de mooie Stellingwarver naeme In de leegte staot an de Heufdweg in Ooldelaemer, vertelt Freddie. En ok dat hi’j et jammer vint dat de ‘blienen’ dichte zitten. Now ja, dat zal misschien te maeken had hebben mit toch wat (te) veul zunne op ‘e ruten of een daggien vot. De naeme zal grif beduden dat de boerderi’je wat lege in et veld staot. Waoromme d’r gebruuk maekt is van twie keer en ‘accent aigu’ is wat ondudelik. En ok hielemaole niet neudig, vanzels! Een dubbele ‘e’ is now ienkeer dudelik zat, niet eers en krek as in et Nederlaans!!

273. Tot kiek es

Aj’ klaor binnen in et gezondhiedscentrum in Oosterwoolde en ie gaon weer vot, dan is et Stellingwarfs bi’j de uutgang weer in beeld mit: Tot kiek es. Dat is ok weer et ‘gewone zeggien’ in et Stellingwarfs aj’ votgaon. Et wodt vaeker bruukt, al wodt et soms nog wel es verkeerd schreven. Dan wodt van ‘kiek es’ ien woord maekt. Vremd, want ie schrieven ommes ‘kijk eens’ in et Nederlaans ok niet an mekere… Et schrieven van et Stellingwarfs is veul makkeliker as dat wel es docht wodt… In dit gezondhiedscentrum gaon ze d’r in elk geval gezond mit omme, en dat is mooi!

272. Kom d’r mar in

Aj’ naor et gezondhiedscentrum van Oosterwoolde gaon woj’ hiel vrundelik ontvongen. Niet alliend deur de meensken die d’r warken, mar ok aj’ binnenstappen, want op ‘e buterdeuren staot, in geef Stellingwarfs en zoas hier bi’jomme zegd wodt: Kom d’r mar in. Zoks is mooi, is ’t niet?

271. Fluuster mien naeme…

Op disse foto staon vier zinnen uut et gedicht Kruuspunt van Johan Veenstra. Et hiele gedicht is in twie baankies beiteld in et centrum van Noordwoolde, daor in vroeger daegen de brogge over de Noordwooldiger Vaort lag. De baankies heuren bi’j een keunstprojekt van keunstener Peter Hiemstra uut Berkoop, die de omtrek van de brogge daor ok weergeven het. (Foto en tekst: Johan Veenstra)

270. de Holthof

De Holthof, dat is de naeme van een siertuun, B&B en vekaansiehuus an de Heufdweg in Hooltpae. Et hadde eins Hoolthof wezen moeten, mar holt in plak van hoolt wodt wel vaeker bruukt. Zoas in: ’t Holtpad (146).

(Foto en tekst: Johan Veenstra)