Tael buten deure

Ok de oflopen daegen kregen we weer een peer ni’je foto’s binnen veur de rebriek Stellingwarfs in et ‘wild’. De foto wodde maekt an de Peperstraote in Else en instuurd deur Jannie Zwaga-Wemer van Oosterwoolde. Et gebied rond de Schaopedobbe is in bezit van It Fryske Gea, dat niet alliend op dit plak de oorspronkelike Stellingwarver naeme bruken blift, mar ok bi’j heur ere netuurgebieden in Stellingwarf. Zo nam et Gea kotleden ok de naeme ‘Lendebos’ over doe de netuurverieninge die bos in zien bezit kreeg.

De kezebol, die Stellingwarver naeme staot op een huus an de Lyclamaweg in Makkinge. ‘Van de bol heb ik ok een foto  neumen,’ zo vertelt Jan Oosterhof van Makkinge, ‘en die liekt op een Edammer keze, eertieds maekt in de zuvelfebriek hiere.’ Onderhaand is dit al weer de elfde naeme die binnenkwam veur oonze rebriek Stellingwarfs in et ‘wild’.

Gerrit’s hutte is de naeme van de voegelkiekhutte van Ni’jhooltpae. Nuumd naor Gerrit de Vries, die eertieds bestuurslid was van de voegelwaacht Hooltpae en omstreken. De foto’s veur de rebriek Stellingwarfs in et ‘wild’ wodden instuurd deur Johan Veenstra.

Tussen Peperge en De Blesse hej’ een viadukt mit een biezundere Stellingwarver naeme. De naeme van dat viadukt van de A32 is Haenebosch. Die naeme komt van een hoeke bos die daor vlakbi’j ligt. Et gaot bi’j Haenebosch dus aenlik om een prachtige, herwertsjaoren oolde veldnaeme, die op disse wieze niet in de vergetelhied raekt. Jaap Elzenaar van De Hoeve maekte de beide foto’s veur de rebriek Stellingwarfs in et ‘wild’.  Op ‘e boverste foto kiek ie in westelike richting naor et dörp De Blesse, op de onderste foto is rechts nog krek een stokkien van de karke van Peperge te zien.

An de Willinge Prinsstraote in Berkoop, vlakbi’j et gebouw van de Stellingwarver Schrieversronte, staot dit huus mit de Stellingwarver naeme De oolde schoele. Lange leden ston op dit plak de legere schoele van Berkoop. De foto´s wodden veur de rebriek Stellingwarfs in et ‘wild’ instuurd deur Johan Veenstra van Ni’jhooltpae.