Op ien van de muren in dörpshuus De Bult van Der Izzerd staot disse mooie spreuke. Aj’ je dus argens thuus en op je gemak vulen willen, moej’ naor Der Izzerd! (Foto en tekst: Johan Veenstra)
Tael buten deure
Meertaelighied in Mestricht
Zoas wi’j foto’s van Stellingwarfs in et wild bi’j mekeer gadderen, zollen d’r ok een hieleboel foto’s van Limburgs/Mestrichts in et wild te maeken wezen. In Mestricht staot de eigen Mestrichtse naeme vaeke onder de Nederlaanse naeme op ‘e straotnaembotties. Kersemarkt wodt dan Keesmerret. En in et Van der Valk-hotel daor we een naacht slaopen hebben, staon allegeer teksten in et Limburgs/Mestrichts in de vloerbedekking die in de gangen van et hotel ligt. (Tekst en foto’s: Johan Veenstra)
176. Eet smaekelik
Aj’ in ziekenhuus Tjongerschaans in Et Vene liggen en eten kriegen, kriej’ daor servetten bi’j daor in drie taelen op staot dat ze hopen daj’ smaekelik eten zullen: Nederlaans, Fries en Stellingwarfs! Ik wete uut onderviening dat et eten daor ok smaekelik is! Behalven vanzels veur de zeurderds en pieperds die altied wat te mierken hebben. (Tekst en foto: Johan Veenstra)
175. Stellingwarverdag
Verschillende dörpen hebben vandaege-de-dag infermaosiebodden bi’j et begin van een dörp staon. Daor staon dan alderhaande aktiviteiten op vermeld die in dat betreffende dörp hullen wodden. De Hoeve het ok van dat soort bodden. Dat doe daor een jaormennig leden de Stellingwarver Dag hullen wodde, wodde dat keurig op die bodden ankondigd. (Tekst en foto: Johan Veenstra)
174. De Beukepolle
De Beukepolle is de naeme van een huus op ‘e Oosterstreek dat in vroeger daegen een boerderi’je was. Polle betekent in dit geval dan ok boerderi’je of boerespul. (Foto’s en tekst: Johan Veenstra)