Stellingwarfs in et ‘wild’

Om et dörp Oosterwoolde henne liggen flink wat buurtschoppen. En bi’j de meersten daorvan is al weer hiel wat jaoren leden een infermaosiebod plaetst daor aj’ de biezunderheden van de buurtschop op lezen kunnen. Et eerste bod dat we in Stellingwarfs in ’t wild zien laoten is dat van De Knölle. Die buurtschop koj’ aj’ vanof de Weperpoolder de kaante van De Fochtel opgaon. Veul meensken daenken dan ok dat De Knölle bi’j De Fochtel heuren zol, mar dat is niet et geval, de buurtschop heurt gewoon bi’j Oosterwoolde! (Tekst en foto’s: Sietske Bloemhoff)

De tekst van dit bod in Hooltpae is dudelik. De Hooltpaeïngers schrieven de naeme van heur dörp meerstal as Olpae. Zoas eerder in disse serie: sportpark Olpae (81), Hobby’s in Olpae (138) en Groeten uut Olpae (245). (Tekst en foto: Johan Veenstra)

Tiedens et dörpsfeest van 2019 kreeg disse bungalow bi’j de zaandgreveri’je an de Vriesburgerweg in Ni’jhooltpae tiedelik de naeme de Karre. De bungalow hadde de naeme An de Wiek (nommer 264 van disse serie). Et huus staot d’r now niet meer. Is kefé de Karre in Tuk (van Mooi man) hier lichtkaans vernuumd? (Tekst en foto’s: Johan Veenstra)

Bi’j nommer 277 van Stellingwarfs in ’t wild gavven we al an dat d’r an de Kuunderweg bi’j Makkinge twie boerderi’jen mit elk een Stellingwarver naeme staon. As we goed teld hebben betekent dat 50% van die weg!

Bruuns Hoghe staot d’r op et veurhuus van de boerderi’je, mar op et infermaosiebod staot de naeme in wat ‘gewoner’ Stellingwarfs: bruunshoge. Disse (veld)naeme was al bekend bi’j de femilie Gorter doe et bedrief nog in hanen was van Albert Gorter, de pake van de boer van now. Gorter was indertied trouwens een hiel trouw lid van de woordeboekgroep van Makkinge. Die groep infermaanten het him, krek as de roem twintig ere woordeboekgroepen, jaorenlang inzet veur et Stellingwarfs Woordeboek. (Tekst en foto’s: Sietske Bloemhoff)

An de Kuunderweg bi’j Makkinge staon twie boerderi’jen mit een Stellingwarver naeme. Dit is de eerste, temeensen aj’ van de kaante van de Prikkedam kommen. De boerderi’je het de naeme de olde kuunder, en dat slat vanzels op de revier De Kuunder, die hier niet veer aachter de boerderi’je langes stroomt ligt. En op sommige plakken in de buurt bin nog stokkies van de oolde Kuunder te vienen, dus van veur de tied dat hi’j rechtetrokken is. Krek as bi’j ere naeme in disse rebriek is jammer genoeg ok hier ‘olde’ schreven in plak van ‘oolde’… (Tekst en foto’s: Sietske Bloemhoff)