Stellingwarfs in et ‘wild’

’t Voegelpattien is een pattien op ‘e Zanen van Ni’jhooltpae in de buurt van voegelkiekhutte Gerrit’s Hutte. De foto is maekt deur Emiel Heida.

Geert’s Pattien is een pattien in Ni’jhooltpae. Et lopt vanof Jan van Huzenslaentien an de noordkaante van Padbargs Bos. Et pattien is nuumd naor winkelman Geert van der Vlugt. Hi’j reddede indertied de patties in de bossen van Ni’jhooltpae op. Veur al zien vri’jwilligerswark kreeg hi’j een keuninklike onderscheiding. De foto is maekt deur Emiel Heida, veur de tekst zorgde Johan Veenstra.

De Barte is een straotnaeme in een woonwiek in Wolvege daor de naemen verwiezen naor netuurgebied Rottige Miente, westelik van Wolvege. Eins hadde et De Batte wezen moeten. Een batte is een hoolten brogge over een briede sloot, meerst zonder leuning. Eerder stonnen in disse serie: De Brogge (13), De Foeke (54), De Miete (82), De Stoeke (142) en De Splitting (183). (Tekst en foto: Johan Veenstra)

Bi’j modeontwarper Hans Noordstrand in Ni’jhooltpae kregen ze verleden jaor een jonge zeune. D’r ston doe een bod bi’j de diek mit de tekst: ’n zeune. Zie nommer 190 in disse serie. Mar ja, de tied gaot vlogge. Now is kleine Pyter op 1 feberwaori 2020 al weer ien jaor. En ok dat staot op een bod bi’j de weg! (Foto en tekst: Johan Veenstra)

Shantykoor Stuyvesant Sailors uut Wolvege bestaot van ’t jaor 20 jaor en dat mag iederiene weten! Vandaor dat dit bod an de weg tegenover hotel Van der Valk staot! (Foto en tekst: Johan Veenstra)