Stellingwarfs in et ‘wild’

Een peer jaor leden maekte ‘k disse foto’s van een kefé in Steggerde. Et zol me niet verbaozen as de kastelein Jehan hiet of hiette. Want ja, ik wete niet iens as dit nog wel een kefé is en as die Jehan daor nog is. Et spul ston doe, zo te zien, te koop. Et woord eem schrieven we eins as even en bij as bi’j, mar et belangriekste is vanzels dat meensken heur eigen tael ok op disse meniere bruken! (Tekst en foto’s Johan Veenstra)

D’r is een woonwiek in Wolvege daor Stellingwarfstaelige straotnaemen verwiezen naor netuurgebied Rottige Miente, westelik van Wolvege. Dit is De Splitting. Een splitting is een ongeveer zes meter briede geule in et vene. Vanuut die splitting koj’ dan an weerskaanten wiedergaon mit et turfstikken. Eerdere straoten uut die woonwiek in disse serie weren De Brogge (13), De Foeke (54), De Miete (82) en De Stoeke (142). (Foto en tekst: Johan Veenstra)

Aj’ in et mooie MFA van Berkoop even bekommen willen kuj’ gebruuk maeken van de ruumte mit de toepasselike Stellingwarver naeme ‘Uutpoester’…

Ok in de kastdaegen bin d’r oplettende ‘wildkiekers’ onder de bezukers van StellingPlus. Zo kuierde de femilie Bruggink van Raevenswoold in de buurt van et Kannedemeer bi’j Else en zaggen bi’j de zonuumde ‘spattelplasse’ dit zitplak mit een Stellingwarver tekst van H.J. Bergveld. De foto’s bin maekt deur Renzo Bruggink.

In meerdere Stellingwarver dörpen willen ze graeg daj’ nog es weerommekommen. Dit bod staot in Hooltpae aj’ daor de Stellingenweg oprieden zullen. In Noordwoolde staot Tot kiek es (nommer 39 in disse serie) en in Noordwoolde staot ok et bod Tot kiekes van Staotsbosbeheer (80). (Foto en tekst: Johan Veenstra)