Jong van hatte mit et Stellingwarfs de toekomst in
Fotorebriek Stellingwarfs in et eupenbaor
Vlakbi’j Domenees Hoeke, waor we disse serie mit begonnen, staot de oolde pasteri’je van Hooltpae. En dat wodt ok dudelik maekt deurdat boven de veurdeure een bod te zien is mit de naeme ”d’ Oolde Pastorie’. Freddie de Vries stuurde de foto in veur Stellingwarfs in et ‘wild’.
In Wolvege is een woonwiek daor de straoten Stellingwarver naemen hebben die verbaand holen mit et netuurgebied Rottige Miente in de Westhoeke van West-Stellingwarf. Eerder al stonnen De Brogge (13) en De Foeke (54) in disse serie. Ie kun van alles an de miete zetten: huj, zaod… In dit geval zuwwe wel an riet daenken moeten. De foto veur Stellingwarfs in et ‘wild’ wodde instuurd deur Johan Veenstra.
De naeme van et dörp Oldeholtpade wodt in et Stellingwarfs as Hooltpae schreven. Mar in et spraokgebruuk wodt ok wel Olpae zegd. Och, now ja… As de Hooltpaeïngers daor op dat sportveld aandere voetbalploegen de doelpunten mar om de oren vliegen laoten! De naeme wodde deur twie meensken instuurd: deur Freddie de Vries, die veur de voetbalklub van Hooltpae ok mennig ballegien goed wus te raeken, en deur Johan Veenstra van Ni’jhooltpae. De foto die hier ofbeeld is maekte laestnuumde.
Aj’ de Spoekedam, een mooi gebied van Staotsbosbeheer om de Spoekeplas in Noordwoolde henne weer uutlopen, ziej’ ok et gebruuk van et Stellingwarfs op nog een bod van SBB. Tot kiekes, zeggen ze, en dat zal grif gebeuren, want et is een mooi gebied. Eerder zaggen we in de serie Stellingwarfs in et ‘wild’ ok al ‘Tot kiek es’, mar dan bi’j een plaknaemebod van Noordwoolde. En veur wie now daenkt is et now ‘kiekes’ of ‘kiek es’: et laeste is goed. Et gaot ommes om twie woorden, in et Nederlaans zol et ‘kijk eens’ wezen. De foto wodde instuurd deur Henk Jager van Berkoop.
Henk Jager van Berkoop stuurde veur Stellingwarfs in et ‘wild’ disse foto op van een bod van Staotsbosbeheer in Noordwoolde. Op et bod staot de Stellingwarver naeme van de poele die daor ligt, en dat is de ‘Spoekeplas’. Sund 2016 bin in de perveensie alle waeternaemen officieel in et Fries, in Stellingwarf gelt dat liekewel veur de Stellingwarver waeternaemen. Dus ok die van de ‘Spoekeplas’.