Daenk om ‘e voegels

spreeuw_Sietske

Foto: Ruurd Jelle van der Leij

 

Daenk om ‘e voegels

 

As een koolde poester

Om de huzen wi’jt,

As et now es haegelt

En dan weer wat sni’jt,

Dan vien ie et noflik

Bi’j de waarme heerd!

En een paantien koffie

Is je hiel wat weerd!

As ‘t zo gloepend koold is

En et vröst, dat ‘t kraekt,

Dan is ‘t krek, as ‘t eten

Twie keer zo goed smaekt!

As de wiend mit vlaegen

Om je slaopen snidt,

Daenk dan es an ‘t vinkien,

Dat op ‘t potrak zit!

An de zwatte liester5!

‘t Bi’jebietertien!

Musken in de hede!

‘t Winterkeuninkien!

Zie ze daor es zitten

Op et kaele hoolt:

Mit een lege maege,

Hongerig en koold…!

Wi’j kun oons nog waarmen,

Eten oons nog zat…

Toe! Maek ze es bliede!

Geef heur ok es wat!

 

(Uut: ‘De oolde Pook’, H.J. Bergveld, haast 1970)