Dichter/schriever Harmen Houtman geft schrieftips op 12 meert
Zin om van ’t jaor mit te doen an et Friese lietiesfestival Liet? Opgeven kan tot vri’jdag 1 april! An dit festival kan iederiene mitdoen die een ni’j lietien naor veuren brengt in iene van de taelen die in Frieslaand bruukt wodden. Dus ok mit een ni’j Stellingwarver lied kuj’ an de wedstried mitdoen. Mar… is je lied nog niet hielemaole klaor, twiefel of zit ie vaaste mit de tekst? Kom dan naor de warkwinkel Songwriting op zaoterdag 12 meert! Tiedens die warkwinkel kriej’ tips van dichters/professionals, die ok jow tael beheersen. Veur et Stellingwarfs is dichter/schriever Harmen Houtman present, hi’j zal je graeg veerder helpen mit je lied. Et mitdoen kost je hielemaole niks; et ienige waj’ even doen moeten is je anmelden via de webstee! Et belooft een inspirerende middag te wodden tegere mit ere muzikaanten en tekstschrievers. De middag wodt orgeniseerd deur Stichting Liet i.s.m. Tresoar, Stichting Ons Bildt en de Stellingwarver Schrieversronte.
Et belooft dit jaor trouwens een biezundere Liet-edisie te wodden. Behalven de warkwinkel Songwriting, wodt d’r veur dielnemers an Liet nog een warkwinkel orgeniseerd. Veur de finalisten is d’r alderdeegst een prachtige meugelikhied om een masterclass te volgen. Win ie Liet? Dan ondersteunt de stichting jow bi’j et maeken van een professionele opnaeme van et winnende nommer en volgt d’r toegang tot et internationaole festival veur minderhiedstaelen Liet International!
Aj’ nocht hebben en doe mit an de warkwinkel en/of Liet, geef je dan op via de webstee www.liet.nl.