Jong van hatte mit et Stellingwarfs de toekomst in
Gerrit’s hutte is de naeme van de voegelkiekhutte van Ni’jhooltpae. Nuumd naor Gerrit de Vries, die eertieds bestuurslid was van de voegelwaacht Hooltpae en omstreken. De foto’s veur de rebriek Stellingwarfs in et ‘wild’ wodden instuurd deur Johan Veenstra.
Ok al gong deur et regenachtige weer van maendagaovend de extra sutelaovend van de Stellingwarver Schrieversroibte niet deur, de aktie leverde mit mekeer € 2000,- meer op as die van veurig jaor. Veur meer as € 12.200,00 wodde d’r in de 41e sutelaktie an Stellingwarver boeken, kelenders en cd;s verkocht. Een risseltaot daor de stichting uut Berkoop ommeraek wies mit is! Niet alliend et eindrisseltaot geft an dat de verkoop van, ok Stellingwarver, boeken weer in de lift zit nao een tied van recessie, mar ok de verkoop per sutelder maekt dat dudelik.
Opni’j wodde de Stellingwarver Spreukekelender veerweg et beste verkocht. Ok hiel goed verkocht wodde de ni’je roman ‘Een vrouw van ivoor’ van Johan Veenstra, en dat gul ok veur et boek ‘Jongesjaoren’van Gerrit Hof. Veul interesse was d’r butendat veur de verschillende fiets- en kuierroutes die de Schrieversronte uutgeft en et boek ‘De dörpen van Stellingwarf in oolde beelden’van Jan Koops en Jan de Vries.
Tussen Peperge en De Blesse hej’ een viadukt mit een biezundere Stellingwarver naeme. De naeme van dat viadukt van de A32 is Haenebosch. Die naeme komt van een hoeke bos die daor vlakbi’j ligt. Et gaot bi’j Haenebosch dus aenlik om een prachtige, herwertsjaoren oolde veldnaeme, die op disse wieze niet in de vergetelhied raekt. Jaap Elzenaar van De Hoeve maekte de beide foto’s veur de rebriek Stellingwarfs in et ‘wild’. Op ‘e boverste foto kiek ie in westelike richting naor et dörp De Blesse, op de onderste foto is rechts nog krek een stokkien van de karke van Peperge te zien.
An de Willinge Prinsstraote in Berkoop, vlakbi’j et gebouw van de Stellingwarver Schrieversronte, staot dit huus mit de Stellingwarver naeme De oolde schoele. Lange leden ston op dit plak de legere schoele van Berkoop. De foto´s wodden veur de rebriek Stellingwarfs in et ‘wild’ instuurd deur Johan Veenstra van Ni’jhooltpae.
Jannewietske de Vries en Johan Veenstra sutelden in Berkoop (foto: Lenus v.d. Broek)
Opni’j sutelde schriever Johan Veenstra mit een bekende politica. Gong hi’j een peer weken leden mit Twiede Kaemerlid Lutz Jacobi op pad, woensdagaovend 9 september sutelde Veenstra mit oold-kultuurdippeteerde Jannewietske de Vries. De beide weren die aovend aachter een kroje vol boeken in de straoten van Berkoop te vienen en verkochten daor ommeraek.
De Schrieversronte sutelt kommende weke maendag veur et laest, daornao verdwienen de krojen weer veur een jaor naor de zoolder. De opbrengst van de aktie zit onderhaand op roem € 10.000,-.