Et Makkingster Shady Lane wodde in 2013 twiede (foto: Lenus v.d. Broek)
Op zaoterdagaovend 22 november wodt Stellingwarfpop opni’j in et dörpshuus van Makkinge holen. Naodat et festival daor in 2013 veur et eerst was, wodde vanwegens de goeie erverings over en weer al gauw besleuten om opni’j naor Makkinge toe te gaon. Vanof half achte kan iederiene in et Makkingester dörpshuus et streekfestival mitmaeken, de toegang is gratis.
Stellingwarfpop is niet zomar een festival, et is een festival waor een wedstried an verbunnen is. Iederiene die mitdot moet op zien minst ien Stellingwarfstaelig lietien naor veuren brengen, et mag daorbi’j niet om een vertaelde cover gaon. Et betekent dus ok dat ok de meziek oorspronkelik wezen moet.
Dit keer doen mit: Megin’s Move, The After Midlife Group, Serge Epskamp, Spirit of the Dark, Carmentheband en Shady Lane. Een deskundige jury, mit o.e. meziekkenner Klaas Ozinga en neerlandikus Peter Riksma, zal de uuteindelike winner anwiezen.
Stellingwarfpop wodt orgeniseerd deur de Stellingwarver Schrieversronte om et gebruuk van et Stellingwarfs binnen de Stellingwarver meziekwereld meer an te vieteren.
Bi’j et aldereerste Stellingwarfpop, dat in 2007 op et Pastorieplein van Wolvege holen wodde, weren d’r minder beparkings om mit te doen as de laeste jaoren. Dat betekende dat doe mar liefst 24 bands heur veur et festival anmelden en veural gebruuk van vertaelings en/of covers. De orgenisaosie besleut om die meugelikhied uut te sluten en de jaoren daornao bleek mitien de kwaliteit van et festival dudelik te verbeteren.