Zunnig begin sutelaktie

DSC_9233, sutelaktie

De sutelaktie van 2013 wodde mit een geweldige galp op de suteltoeter eupend deur vaaste Schrieversronte-vri’jwilliger Jan de Vries uut Wolvege (foto: Lenus v.d. Broek).

Mit prachtig weer gong maendagaovend 26 augustus de sutelaktie van de Stellingwarver Schrieversronte uut aende. Veertien ploegen gongen mit de sutelkrojen op pad om in een diel van Wolvege en in een pat van de Westhoek Stellingwarver boeken an de inwoners daor an te bieden. De eerste aovend zette mitien al goed in, want d’r wodde veur meer as €2.500,00 verkocht. Opvalend was weer de grote belangstelling veur de Stellingwarver Spreukekelender, mar, zoas verwaacht, wodde ok de spiksplinterni’je routegids ‘Wandelen rond Wolvega’ van Geert Lantinga biezunder goed verkocht.

DSC_9247, sutelaktie

Sutelders Henk Veen van Oosterwoolde en Annie Dedden van Blesdieke verkopen et kienderboek Muske en Fret (van Herma Egberts) bi’j jonge belangstellenden (foto: Lenus v.d. Broek).

Op woensdag 28 augustus wodt d’r veerder suteld in Stellingwarf-Westaende, de sutelders kommen dan o.e. in Noordwoolde.