Jong van hatte mit et Stellingwarfs de toekomst in
Fotorebriek Stellingwarfs in et eupenbaor
In Stienwiek kuj’ bi’j Electro World Oosterhof een biezundere stofzoeger kopen: ’t Steenwieker Stofzoegertien. Te gebruken in bedrieven en thuus, zo wodt angeven. Wat een aorige aktie! En daor heurt nog meer bi’j, want aj’m kopen kriej’ d’r een jaorabonnement bi’j van et tiedschrift ‘Old Steenwiek’ van de Historische Verieninge van Stienwiek, dat vier keer in et jaor uutkomt. (Foto en gegevens: Henk Jager)
De Stobbepoelweg is een aandere straote mit een Stellingwarver naeme in de buurtschop Bovenveld bi’j Donkerbroek. Van ere straotenaemen bin de naemen op ‘e bodden spietig genoeg in et Nederlaans, zoas bi’jglieks ‘Schapedrift’ en ‘Hanestreek’. Deur tal van bewoners zal liekewel nog altied Schaopedrift en Haenestreek zegd wodden. Stobbepoelweg hadde aenlik ok Stobbepoeleweg wezen moeten… (Foto en tekst: Sietske Bloemhoff)
In Donkerbroek hej’ nog altied de levendige buurtschop Bovenveld daor een peer straoten Stellingwarver naemen hebben, zoas Ruskeweg. En eers as dat wel es docht wodt is die Donkerbroekemer buurtschop, die an iene kaante greenst an de Duurswooldiger heide, zo Stellingwarfs as wat. ‘Daorginderd begint Frieslaand, daor praoten ze Fries,’ vertelde een bewoner me doe ik disse foto maekte, ‘hier is et Stellingwarf!’ (Foto en tekst: Sietske Bloemhoff)
Dit staot op een grafstien op et karkhof van Ni’jhooltpae. De stien is van mien neve Bart Krol en zien vrouw Pietje de Vries. Op et karkhof van Ni’jhooltpae bin vier grafstienen mit teksten in et Stellingwarfs d’r op. (Foto en tekst: Johan Veenstra)
Steenwieker toorn,
De mist van de Kaampe,
In et ochtendgloorn,
De sun as ’n laampe
Op de Steenwieker toorn.
‘k Eb overal ezeten,
‘k Eb zoveul ereisd,
Och, ie mossen ies weten
Waor ‘k al bier eb eheisd.
‘k Kan overal an maarken,
Da’k ier bin geboorn,
Want dan mis ik
De grote kaarke
En de Steenwieker toorn.
Refrein
De Onnegiesstraote,
De Maark, ’t Diep,
A’k gien Steenwieks meer praote,
Krieg ik seins de griep.
Gien plaese op eerde
Kan mi’j meer bekoorn,
Want ik kenne de weerde
Van de Steenwieker toorn.